Cancer damdawi-ah QR code dah dawn

Cancer damdawi lem a awm thu report a awm hnuah, sorkar laipui chuan rang taka hma lain, damdawi lem venna turin India rama cancer damdawi zawrh chhuahah QR code dah vek a tum.

Drugs technical Advisory Board (DTAB) in tun hnaia meeting an neihah cancer damdawite a lema thlak a awm ṭhin tih sawi awm chu ngaihtuahin, damdawia QR dah hi an rel a ni. Board chuan thil sual titute hian damdawia pharmacy te thawhpuiin, cancer damdawi man to tak tak bur chu lo siam danglamin an lo pawlh dal ṭhin niin a sawi. "Hetianga damdawi lem an siam, damlote hnena an hralh chhuah hian damlo nunna chu dinhmun derthawng takah a dah a ni, " tiin Board meeting chuan an sawi. Heng thil thleng vang hian sorkar laipui chuan damdawi lem zawrh chhuah ṭhin laka mipui himna turin a zawn chhuah hna pawh ngawrh taka a kalpui tur thu a puang.

India ramah hian cancer enkawlna, chemotherapy course hi an damdawi hman azirin Rs nuai 1-4 inkar a ni a, Radiation therapy hi Rs nuai 1- 3 inkar ani bawk. A chang phei chuan treatment pahnih hi lak kawp te a ngai bawk ṭhin. Damdawi man hautak nena inenkawl ṭhin an nih laia, cancer damdawi lem lo siam an awm ṭhin chu sorkar chuan ven a tum a, QR code dah a nih chuan ran takin heng damdawite hi a tak ngei an ni em tih fiah theih nghal an ni dawn a ni.