AMA 50th Anniversary Special an hmang

American Music Awards (AMA) 50th Anniversary Special chu an ram huna Pathianni zan khan Los Angeles, California-a L.A. Center Studios ah neih a ni a, darkar hnih chhung hun hmangin performance ropui tak tak hmuh tur a awm. Hemi zana perform zingah hian Mariah Carey, Jennifer Hudson, Brad Paisley, Green Day, Gladys Knight, Stray Kids, Kane Brown, Chaka Khan leh Raye te pawh an tel.

AMA hi kum 1974, February 19-ah neih ṭan niin, show hmasa bera host pathum zinga pahnih, Roger Miller leh Helen Reddy te an boral tawh a, show creator leh TV producer Dick Clark pawh a boral tawh bawk. Show neih hmasa bera host pathum zinga la dam awmchhun, Motown legend Smokey Robinson chu anniversary show-ah hian a rawn inlan thei thung. Ani bakah AMA host leh co-host lo ni tawh, Gloria Estefan, Jennifer Lopez, Reba McEntire, Jimmy Kimmel leh Cedric the Entertainer te pawh an inlan thei bawk.

Show ṭanna atan hian AMA hmasa ber neih ṭuma clip package pholan a ni a, heng zingah hian Stevie Wonder-a'n “Superstition”a play lai leh, Gladys Knight & the Pips in 'Midnight Train to Georgia' an perform lai pawh a tel. Heng pahnihte hi kum 1973 khan Billboard Hot 100-ah No 1 an ni ve ve a ni. Pathianni zan hun hmanah hian show neih tawh hrang hrang clip pholan a ni bawk a ni.