Zorinsanga Sailo 'Beiseina' a chhuak ta

Mizo mipa gospel artist kan neih ṭhat, Zorinsanga Sailo music video thar, 'Beiseina' chu nizan khan a chhuak ta. He hla hi kumina a music video pahnihna niin, a hla hi ṭang (hot) lam, a sak tam zen zen loh lam a ni thung.

'Beiseina' hi Zodingliana Zote phuah niin, Covid 19 hri len lai, kum 2021 kumtawp lama a phuah a ni. "Hetih hun laia beiseina kan mamawh zia leh Pathiana kan beiseina nasat zia rilrua lang chungin Pathian ka rawn a, a thu leh a thluk ruangam a rawn lang thei ta a ni," tiin kuminah Zorina nen hian thawkdunin, audio leh video hi an siam thei ta a ni. A video hi Anthony Wowv Production Video kutchhuak a ni a, soundtrack hi Lal K Sailo in a siam a, audio hi HC Recording ah an ti a ni. Shooting hi Hyve City Hall ah neiin, music video-a lamte hi Ab Remruata, Remsanga, Reuben, Rebecca leh Pci te an ni.