LBS Suzuki Youth Icon 2024 : Zaninah Top 6 intihsiak

LBS Suzuki Youth Icon 2024 chu ngawrh taka neih mek a ni a, contestant-te thlitfim chhoh zel an ni. Zaninah Top 6 kan hre thei tawh dawn a, an intihsiak zui nghal bawk ang.

Youth Icon Top 10 thlan chhuahte chu tunkar Thawhṭanni aṭang khan LPS Arena, Falkland-ah intihsiakin, zantin inelna hi neih a ni a, pakhat an tla zel a ni. Top 10 aṭang hian Lalremsiami a tla hmasa ber a, Top 9 intihsiakna aṭanga tla Zion Tlaichhun chu judge zinga mi, Victor chuan Wild Card hmangin a chhanhim a, hei vang hian intihsiaknaah a tel chhunzawm thei ta a ni. Top 8-ah mi pakua an awm tak avangin mi Top 7 result puanah, judge dang pahnih - Rosy leh Andrew ten Wild Card an hman loh chuan contestant pahnih an tla tawh thung ang. Youth Icon judge-te hian Wild Card hi vawi khat ṭheuh an hmang thei a ni.

October 14, Thawhṭanni ah Top 5 result puangin an intihsiak zui leh dawn a, October 15-ah Top 4 te an inel leh ang. Top 3 te chuan October 17-ah intihsiakna nei chhunzawmin, Youth Icon 2024 Grand Finale hi October 19, 2024 (Inrinni) ah neih a ni ang.

Youth Icon hi Top 10 aṭangin mentor-te enkawlna hnuaiah an awm a, mentor-te hi Kima Chhangte, Homefree Music; Thangbawiha, EME Records; Tluanga Hnamte, Westend Studio leh Peka, It Is Homestudio-te niin, anni hian contestant-te hla thlan leh zirtir bakah track thlengin an buaipuisak a ni.