LBS Suzuki Youth Icon : Zaninah Top 5 kan hre dawn ta

LBS Suzuki Youth Icon 2024 Top 5 chu zaninah kan hre thei dawn ta. Top 5 te hian LPS Arena, Falkland-ah intihsiakna hi an nei chhunzawm leh nghal dawn a ni.

October 12, 2024, Inrinni zan khan Top 6 result puan a ni a, Ramengmawia, Meidum chu thlah liam tur nia ngaih a nih laiin judge zinga mi, Andrew chuan a Wild Card hmangin a chhanhim a, intihsiaknaah a tel chhunzawm leh thei ta a ni. Top 6-ah mi pasarih an intihsiak tak avangin, zanina result puan hunah mi pahnih an tla thung ang. Top 6-a tlingte chu - Lalbiakkima Hnamte, Thentlang; Lalsangliana, Bawktlang; Samson Lalhunruata, Champhai Kanan Veng; Peter Lalnupuia, College Veng; Laldinhlua, Champhai Kanan Veng; Zothankima, Tachhip leh J.Lalrosanga, Tuidam te an ni.

Icon judge-te hian Wild Card hi vawi ṭhat ṭheuh an hmang thei a, Victor leh Andrew te chuan contestant dang an chhanhim thei tawh dawn lo a, mahse Rosy erawh chuan a Wild Card a la hmang ve lo thung.

Inrinni zanah khan 'The Beatles Night' hman a ni a, contestant-te hi The Beatles hla pakhat leh, Top 10-a an hla sak tawh zinga an duh ber pakhat hmangin an intihsiak a ni. Zaninah Top 5-te intihsiakin, naktuk zanah Top 4 an intihsiak leh ang. Zan khat awlin October 17 zanah Top 3 te an intihsiak leh dawn a ni. Grand Finale hi October 19, 2024 Inrinnni zanah LPS Arena-ah neih a ni ang.

Mizorama reality television show hmasa ber, Youth Icon hi kum 2006 aṭang khan neih ṭan niin, kumin hi vawi sarih buatsaih a nihna a ni.