Ashton Kutcher leh Mila Kunis-ten Europe a pem duh

Rapper Sean Diddy Combs-a'n chanchin ṭha lo tak tak a neih mek avangin a ṭhiante hming pawh sawi lan a ni fo a, heng zingah hian Ashton Kutcher leh Milan Kunis te nupa hming pawh sawi rik a ni tel fo. An nupa hian hetiang boruak awm mek hi tlansan a, US aṭanga Europe lama insawn dan an ngaihtuah mek nia sawi a ni.

Diddy hi sex-trafficking chungchangah thubuai eng emaw zat neiin man a ni tawh a, a thubuai hi nakkum lamah ngaihtuah tum a ni. Hollywood lamah ṭhianṭha a lo ngah a, a party buatsaihah tel ṭhin pawh an ṭhahnem hle. Hetih lai hian a thubuai neih ṭhenkhat hi a party buatsaihte nena inkaihhnawihte a awm avangin, heng party-a tel mi lar dangte hming pawh sawi lan an ni fo a, rinhlelh tawkte pawh an awm. Ashton leh Mila te pawh Diddy nena inṭhianṭha, a party ṭhenkhatah pawh lo tel tawh an ni a, hei vang hian hetiang boruak laka inthiarfihlim a, Hollywood tlansan a, an fate pawh Europe lama sei lentir an duh niin a lang.