Khiangte Construction Ṭhazual Gospel : A chung berah One in Christ 'I Pathian tawk turin inpeih rawh'

Mizo gospel group kan neih ṭhat, One in Christ chuan , 'I Pathian tawk turin inpeih rawh' music video an siam thar leh chu Khiangte Construction Ṭhazual Gospel chart tharah a chung ber dinhmun an luahpui.

'I Pathian tawk turin inpeih rawh' hi Pastor Benjamin Lalrinmawia phuah a ni a, music hi Andrew Vanchhawng siam niin, recording hi Studio A-16 ah an ti a, video hi BS Pictures kut chhuak a ni. Official music video hi August 15 khan an YouTube channel-ah an dah chhuak a ni.

Kum 2016 khan 'I Pathian tawk turin inpeih rawh' music video hi an lo siam tawh a, kumina member tharte nen music video hi an siam thar leh a ni. He hla hi an album, 'Nang hnaihin' tihah an dah a ni. One in Christ zaithiam zia leh, an zai ngaihnawm zia kan hria a, zaia rawngbawl tura sawm hlawh ber pawl an la ni thei zel a ni. An hla dang, 'Krista hnehna changtute' chu No 9-ah a lang bawk a ni.

Hlimhlimi 'Grep hrui tak' chu pahnihnaah a rawn chho a, he hla hi ama phuah niin HC Recording Studio-ah recording a ti a, music video hi WoWv Production kut chhuak a ni. Cindy Lalthanpuii 'Ka nghakhlel' tih chu pathumna niin, he hla hi Thartea phuah a ni a, amah pawhin a lo sa lar tawh hle a ni. Electric Veng KṬP 'Nunna i la nei e' leh, Dinsangi ft To Coda 'Lalpa i fak ang' tihte chu Top 5-ah an lang bawk.

Ṭhazual Gospel Top 10-ah hian Seraphic Choir, Vesper Vuite, Teruati Tochhawng leh F.Lallawmawmi (Awmawmi) te an awm bawk a ni.