Blue Corn MV thar 'Luah loh Zun' a hit; Mi mala project tih chhuah hmabak an nei

Mizo girl group hlawhtling leh boruak nei lian ṭhin, Blue Corn-ten kum 10 chuang hnua music video thar an rawn tih chhuah, 'Luah Loh Zun' chu a hit hle a, view pawh a pung chak hle.

Blue Corn member - Kimkimi, Tlingi leh Felicia-te hian 'Luah Loh Zun' hmaa music video an tih chhuah hnuhnung ber chu kum 2012 daih tawha mi, 'Min hlan ve ta che' tih kha a ni. Hemi hnu hian an awm darh tak avangin group angin thil an ti ho thei tawh lo a, mahse kum 12 hnuah an inhmukhawm leh thei hlauh a, music video thar hi buaipuiin kar liamta, October 11 zan khan an ti chhuak a, Mizo rimawi khawvelah thawm an rawn nei ring leh nghal hle. Mi tam tak lung an ti leng a, an zai thiamin an zai ngaihthlak a la nuam hle zel.

Group member-te hi an awmdarh leh tak avangin group anga hla tih chhuah leh theih hun an la sawi thei lo a, mahse mimal ang erawh chuan project an neih ṭheuh thu Kimkimi chuan Vanglaini a hrilh. Kimkimi hian a hla phuahte, lengzem leh lenglawng chu amah bakah tunlai zaithiam chhuak tharte sak tira music video siam a tum. Hei bakah hian Krismas hla, lengzem chu kuminah tih chhuah hman a tum bawk. Hla hi paruk vel a nei tawh tih a sawi. Kimkimi hlate hi Blue Corn YouTube channel-ah dah a ni ang. Kimkimi leh Felicia-te hian Mizo nursery rhymes an ti chhuak dawn bawk a, hei hi zo fel tawhin Felicia channel-ah an dah dawn a ni. Tlingi leh Kimkimi hian English nursery rhymes an buaipui mek bawk a, Tlingi fanu Amber hminga YouTube channel siamah an dah thung ang.