'Detective Pikachu' sequel siam tur a leak

Pokeman franchise developer, Game Freak data leak aṭangin, 2019 Pokemon movie chhunzawmna tur buaipui mek a ni tih hriat a ni.

Kum 2019-a chhuak, 'Pokemon Detective Pikachu' kha a hlawhtling hle a, hei vang hian a chhunzawmna siam a ni dawn tia sawi thawm pawh a tam hle. A buaipuitu lam hian engmah thawm an nei lo a, mahse data leak avangin kum 2021 aṭang khan a chhunzawmna tur hi an lo buaipui tih hriat a ni a, a film hming tur pawh 'The Great Detective Pikachu' tih a ni. 'Kong: Skull Island' director Jordan Vogt-Roberts chuan Pikachu film thar hi a direct nia sawi a ni bawk. Document leak-ah hian film plot pawh tihfel vek tawh niin, kumin chhunga tih chhuah tum nia tarlan a ni. Mahse Pokemon Company lam chuan sequel siam a ni em tih hi engmah an la sawichiang lo thung.