Gospel-ah hmeichhia an langsar zawk

Zonet-in Ṭhazual Awards a siam turah, Vogue Best New Artist (Gospel) huang chhungah hmeichhia hlir kan nei a, mipa an lang lo. Mipa zaithiam kan tlachham ta deuh a ni mai ang em? Vogue Best New Artist-ah hian Lancy Remlalhruaii hla 'in hruai zel ṭhin', Becktei Sailo hla, 'Hringnun piah pialral', Grace Lalchhanhimi 'Ka thinlung chelh­tu', Lalhlumawii 'Lei leh van siamtu' leh Hlimhlimi hla 'Ka lo hmu ta' tihte a awm.

Lancy Remlalhruaii hi kan hria a, Mizo Idol hnuhnung berah khan fans ngah ber pawl a ni a, pathumna a ni. A music video hmasa ber 'Min hruai zel ṭhin' tih kha a hit a, Ṭhazual chart-ah pawh a lang ngun pawl, mite thlan hlawh pawl a ni. Chart-ah vawi sarih ngawt a lang thei a, top 5 erawh a inbang kai lo thung. Chumi avang chuan Lancy hi a zaithiam lo tih chi a ni lo a, a zaithiam zia kan hria e.

Mizo Idol hnuhnung bera pakhatna Grace Lalchhanhimi hi a thiam tih sawi vul teh chuk a ngai lo. A hla 'Ka thinlung chelhtu' kha a hit em em a, a lar a ni. Ṭhazual chart-ah pawh vawi 11 zet nikum chhung khan a lang hman a, pakhatna ṭum khat a hauh mai bakah, pahnihnaah vawi hnih a awm a, pathumna pawh vawi thum lai a hauh.

'Hringnun piah pialral' kha a hit hle a, Becktei Sailo hi Zoram khawvelin kan hriat larna ber pawh a ni. Kha hla hmang khan Becktei hi Ṭhazual chart-ah vawi kua ngawt a lang. Ani pawh hian pakhatna chu hauh em lo mah se, a hla a hit a, khawlaia sak hlawh a ni. Kha hla aṭang chauh pawh khan Becktei hi Best New Artist-a lang thei turin a zaithiam tawk tih a hriat hle.

Mi tam takin Mizo Idol-a pakhatna a nih hial an rin, Hnahthial nula, Lalhlumawii hi a thiam lo ti ila kan sawi sual hle ang. Vogue Best New Artist-a lang tur hian a thiamzia sawi chhuah chawp chiam a ngai lo. Chart-ah pawh vawi riat ngawt langin, pakhatna phei chu vawi li lai a hauh nghe nghe a ni. Hei bakah hian pathumna vawi khat leh pangana vawi khat a hauh bawk.

Hlimhlimi hi nikum khan a che ṭha hle a, che ṭha tur chuan a thiam a ngai a, a thiam rêng bawk. Ṭhazual chart-ah pakhatna vawi thum zet hauh thei hi a chhe thei lo hrim hrim. Pahnihnaah pawh ṭum hnih ngawt a awm a, palina, panga leh pasarihna ṭum khat ṭheuh a hauh thei bawk. Chart-ah hian nikum chhung khan a pumpuiah ṭum riat a lang thei a ni.