Mi lâr, chhungkaw pa nih tlingte

Pa nih hi thil harsa ni lo mahse mawhphurhna nasa tak a ken tel avangin thil zuamawm zawk zawk a ni lo! Hollywood mi lar, lemchan leh eizawnaa hlawhtling tak takte pawh hi he kawngah hian an hlawh­chham fo a, hetihlai hian chhungkaw pa nih tling tak takte pawh an awm a, chungte mite chanchin kan tarlang dawn a ni.

1. Brad Pitt

Maddox, Zahara, Shiloh, Pax, Knox leh Vivienne te pa a ni a, chhuanlam siamna tham fa enkawl tur neiin, Hollywood lemchan lamah hlawhchham pawh ni se a fate nen chhungkaw zaipawl din tham an ni.

Hetihlai hian Angelina Jolie duatlai, Pitt chuan chhungkaw enkawl a, fate ṭhanlen lai thlir chu thil duhawm leh hlimawm ber a ni, a ti.

"Chhungkua ka neih aṭangin khawvela hausa berah ka inngai a ni. Pa ka nihna hian ka nunah danglamna nasa tak a thlen a, min tihhlim bakah ka thil phal bawk a ni. Ka fate chu ka nuna thil thleng ngei ngei tur, pawimawh takah ka ngai a, khawvela an damkhawchhuah theih nana zirtirna pek te leh a ṭanpuitu nih chu thil nuam tak a ni. Pa nih leh mawhphurhna a ken tel zawng zawngte hi nuam ka tihzawng tak a ni," a ti.

2. David Beckham

'A ngaihtuah thui thlak loh mang e' tih tur khawpin fa a nei tam tawh a, mahse naupang ngaina tak David Beckham tan fa pali neih hi phurrit a ni lo. An fate chu a nupui Victoria Beckham nena an inzawmna tinghettu an ni, a ti a, zingkara a fate school kal tur a thlah thei te leh tlai lama a hmuak leh thei chu lawmawm a tih thu leh vannei a tih thu a sawi.

Beckham te nupa hian an fanu naupang ber kum thum mi, Harper-i enkawl turin awmpui an la thei mahse Beckham chuan a fanu diaper thlaksakte, a eitur siamsak te leh tlai lama a fapate inkhel tura chhuahpuite chu a thil nuam tih ber a ni, a ti.

Archbishop of Canterbury chuan chhungkaw pa ṭha tak a nih avangin a fakawm a tih thu a sawi tawh a, football inkhelha chawimawina tam tak a dawn piah lamah pa ṭha nihnaa chawimawina pawh a hui ṭeuh tawh bawk.

"Ka nunah hian hlawhtlinna tam tak ka nei tawh a, mahse ka chhung­kua hi ka hlawhtlinna lian ber a ni," tiin chhungkaw pa ṭha ni tur chuan a tam thei ang ber nupui leh fate tana hun hman a ni, a ti.

3. Will Smith

The Fresh Prince of Bel Air film-a pa thawveng tak, fiamthu duh leh rap thiam hi chhungkaw pa ṭha tak a nih i ring lo a nih pawhin The Pursuit of Happyness film aṭang chuan pa nih tling tak a ni tih i hmu thiam ngei ang. Smith hian a nupui Jada Pinkett nen fa pahnih an nei a, a nupui hmasa Sheree Zampino lakah fa pakhat a nei bawk.

Rapper leh lemchan thiam Smith hian a fate hi a hnathawhnaah a teltir tam hle a, a nupui hmasa Zampino-i laka a fapa, Willard Carroll "Trey" Smith III chu "Just the Two of Us" music video-a siampui bakah Trey-a hmingchawia company an din, Treyball Development Inc an enkawl dun bawk. A nupui Jada laka a fapa, Jaden Smith chu The Pursuit of Happyness leh After Earth-ahte a chanpui tawh bawk.

Jaden-a channa, The Karate Kid film hlawhtlinna hian pa nihnaa Will Smith hlawhtlinna chu a nemnghet awm e! He film hi Smith leh a nupui Jada-in an produce a ni.

Smith chuan rap leh lemchan chu nuam tiin, hlawhtling viau mah se pa a nihna chu hna ṭha bera a ngaih thu a sawi a, a fate chungchangah hrem ai chuan anmahni duhthlanna hmang thiam tura zirtir pawimawh a tih zawk thu a sawi.

4. Adam Sandler

'You Don't Mess with the Zohan' film nuihzatthlak tak avangin ṭhalai zingah a hre lo kan tlem lo ang. Kum 2003-ah a nupui Jackie Sandler a nei a, fanu pahnih an nei a, a fanu pakhatna kum 2006-a a neih aṭangin a lemchan tam zawk chu chhungkaw chanchin a ni a, chhung­kaw pa lemah a chang ṭhin a ni. A film-ah hian chhungkaw dinhmun hrang hrang a tarlang ṭhin a, chhungkaw pa mawhphurhnaa harsatnate leh a chhungkaw hlim­awmna hrang hrang te a tarlang ṭhin bawk.

A lemchana a role thlante hian a nun pangngaiah pawh nasa takin a nghawng a, a lemchan tur leh a role chan tur chu nakina a fate zirtirna pe thei tur a thlang ṭhin a, a nupui leh fate chuan a ṭha zawngin a role thlan dan an thlak danglamsak a ni.

Adam chuan, a fate chu an hmelchhia emaw an hmelṭha emaw a hmangaih ber an ni, a ti a, a nupui nen chuan fa neih zel an la tum thu a sawi bawk.

"Jackie-in fa 12 neih a duh a, keiin 16 ka duh, kan la hria ang chu," tia fiamthuin fa neih zel an tum thu a sawi.

5. Hugh Jackman

X-Men film-a Wolverine lem a chan aṭanga kan hmelhriat, Australian lemchan thiam Hugh Jackman hian a nupui, Deborra-Lee Furness nen fa pahnih an lak (adopted) an enkawl mek a, chhungkaw pa niha fate enkawl chu lemchan lama a hnathawh nen inbuk tawk taka kalpui thiam a pawimawh thu a sawi.

Jackman chuan a thawpui te nen meeting neih tur chungchanga an inbiak zawh hnuah a fate tan zan lamah thawhthu bu chhiarsak a ṭul ṭhin thu a sawi a, fate enkawl chung­changah tawnhriat nei tam lo mah se lehkhabu ah a chhiar ṭhin thu a sawi a, mahse lehkhabua a chhiarte chu a taka hmanna a tlem thu a sawi.

Jackman chuan a hnathawh chu pawimawh viau mahse an chhungkua chu thil pawimawh ber a nih thu a sawi.