Ṭhazual Award 2024 Nomination an puang ta: Nomination hmu hnem ber Jonathan Lianhna, Lengzemah Youngfella bawk langsar

Zonet Cable TV-in kumin November thlaa a sem tur, Ṭhazual Award 2024 nomination chu nimin, October 16, 2024 khan puan a ni ta. Caterogy 16 awmin, Gospel leh Lengzem-ah ṭhen an ni leh a, Band of the Year ah chuan huang khatah dah an ni.

Kumin hi Ṭhazual Award vawi 10-na tur a ni a, show hmuhnawm leh ropui tak rawn chhawp chhuah an tum. Ṭum dang ang bawkin Gospel leh Lengzem zan a hranin siam a ni leh dawn. November 7, 2024-ah Gospel zan hi hman a ni ang a, November 8, 2024-ah Lengzem zan hman a ni thung ang. Mizo rimawi khawvela boruak nei lian tak takte chetla hmuhnawm leh pui tak kan hmu leh thei dawn e.

Ṭhazual Awards 2024 nomination hmu hnem ber chu Jonathan Lianhna niin, nomination panga a hmu. Ṭhazual Award 2023-ah Best Male Artist (Gospel) ah thlan a lo ni tawh bawk a ni. Jonathan Lianhna bakah Gospel lamah nomination hmu hnem dangte chu Zorema Khiangte (4), Thawhlehnaniropuia (3), Cindy Lalthanpuii (3) leh Israela Pachuau & Vanlallawmawmi (3) te an ni.

Lengzem lamah nikuma Best Male Artist award dawngtu, Youngfella a la langsar leh ber. Nomination hmu hnem ber niin category 4-ah nominee a ni. Lilac leh Mary Dawngi chuan nomination pathum ve ve an hmu. Nomination pahnih hmu hi Guru Gee, Siampuii Ralte, Saiwanah & Vashty bakah Latei Hringen & CT Tluangtea te an awm bawk.

Ṭhazual Award 2024 hian pawl tih bik nei loin, Mizo zaithiam, November 2023 aṭanga October, 2024 inkara music video ti chhuakte a huam a ni.