Ṭhazual Awards Best New Artist tunge ni ang?

May thlaa sem tura ruahman, Ṭhazual Awards-a MD Enterprise Best New Artist turah thlan tur ber hriat a har deuh a, mipa ai chuan hmeichhia bawk hi an âwm leh hmel zawk mah. Nikum, kum 2014 chhunga chart-a an dinhmun, an lan ngun dan leh an thlen san dan aṭanga ringawta thlan tur a nih lohna hian hriatthiam a ti harsa zual.

Vanlalauva hi Mizo Idol-ah khan kan hre ṭan a, a aw a pa a, a zaithiam a, a la naupang a, hmalam hun êng tak a nei. Nikum khan music video pakhat chauh a nei a, 'Phurh zawh loh zûn' a ni a, he hla hmang hian MD Enterprise Best New Artist (Lengzem)-ah a rawn lang a ni. He hla hi nikum chhung khan Ṭhazual Chart-ah vawi li a lang a, top 5-ah a lang pha lo, amaherawhchu a satu, Vanlalauva hi a thiam a, a buk a rit viau ang.

Thangromawia Thomte tan nikum kha kum chhinchhiahtlak a ni ang. 'Phu loh lung di' kha a hit-pui viau a, kha hla hmang hian Mizo mipaah chuan top zingah a invawrh kan ti thei ang. He hla hi chart-ah vawi ruk a lang a, pakhatna pawh ṭum thum zet a hauh thei a ni. Hei bakah hian pahnihnaah vawi khat leh palinaah vawi khat a lang bawk.

Eli L. Lawitlang hi a thiamzia kan hria. Nikum khan chart-a lang thei hla pahnih a nei a, tuna a rawn lanna hla chu 'Ṭhenzai ka rel tawh che' tih hla a ni. He hla hi chart-ah vawi nga a lang a, pahnihna, pathumna, palina leh parukna bakah pakuanaah te a lang. Hei bakah hian 'Ka dem lo che' tih hla kha a hit-pui em em bawk. Hei phei chu chart-ah a dinhmun a ṭha hle. Vawi kua ngawt a lang a ni.

'A dam ve tur' tih hmang Christy Zaithanchhungi chu MD Enterprise Best New Artist Lengzemah a rawn lang. He hla hmang hian Christy hian nikum khan chart-ah vawi 11 a lang a, pakhatna ṭum khat a hauh a, pahnihnaah ṭum thum, pathumna ṭum khat leh palina ṭum thumte a hauh. 'Chhingkhual leng dang' tih hla hmangin Christy hi nikum khan Ṭhazual chart-ah kan hmu fo bawk. He hla hi chart-ah ṭum sarih zet langin, pathumna ngawt pawh ṭum hnih lai a ni nghe nghe. Hriatrenga nena an sak 'Muanna nge hmangaihna' tih pawh a hlawhtling hle a, chart-ah ṭum ruk lai a lang a ni.

Hnahthial nula Essy hi a buk rit ber pawl a nih ngei a rinawm. Nikum September thla aṭanga a dah 'Inchhuang mai lo la' tih hla, a music video hmasa ber hmangin nominee-ah a rawn lang a, he hla hi chart-ah nikum chhung khan ṭum sarih ngawt a lang a, pakhatna erawh a nihpui hman lo a, kuminah erawh he hla hmang hian pakhatna a hauh thei.

Chart-a an lan chinho hi nikum chhung bika mi chauh tarlan a ni. kumin thlenga lang zui pawh an awm.