HSLC Topper Jennifer Vanrammawii Zan lamah chauh lehkha a zir Ṭhin

HSLC-a Mizorama pakhatna, Jennifer Vanrammawii, R. Lalbiaktluanga fanu, Baptist Higher Secondary School, Serkawn hian zan lamah lehkha a zir tlangpui a, school chawlh a nih erawh chuan nileng deuh thawin lehkha a zir ṭhin.

Jennifer-i hian a tlangpuiin zan dar 7 aṭanga dar 12 a zir ṭhin a, zibg dar 2 pawh a zir thleng fo. School chawlh a nih thung erawh chuan chawhma dar 10 aṭanga tlai dar 4 thleng a zir ber a, a kar laka thingpui in chawlh a nei zawk tih loh chu a zir ngar ngar ṭhin a ni.

"Ka nu leh paten ka zirna kawngah an theih ang tawkin min ṭanpui ṭhin a, kan in-exam dawnte hian ka kal hmain ka nu hian ka lu chunga kut nghata ṭawngṭaiin mi thlah ziah ṭhin a ni," a ti. "Kan zirtirtute an fel a, min pui nasa a, ka thiam loh an hlau a, an inhawng em em a ni," a ti bawk. "Ka tum ber chu Doctor a ni a, science ka la chhunzawm ang a, Pathianin rem a tih chuan Doctor ni turin theihtawp ka chhuah zui zel ang," tiin Jennifer-i hian a sawi.

"Ka result min rawn hrilh hmasak ber chuan ka awi lo lutuk a, min rawn phone a, min rawn hrilh ṭhin a, awi mai harsa ka ti hle. Ka pain min rawn hrilh hnuah chauh tak tak a nih ka ring ta a ni. Ka result kan hriata kan tih hmasak ber chu chhungkuain Pathian hnenah lawmthu sawiin kan ṭawngṭai," a ti. Jennifer-i hian tuition a kal lo a, class a hmang ṭangkai hle a, class chhungah an zirlaite a hriatthiam ngei theih nan a ngaithla uluk hle ṭhin a ni.