MSL Dance Battle Final Myn'X leh Nerds of War te inbeihna tur

Ṭhalai tam takin an ngaihven leh hmuhnawm an tih, MSL-a mite hîptu pakhat chu Dance Battle hi a ni. Zanin hian a vawrtawp a thleng dawn ta a, Myn'X leh Nerds of War te an in-battle dawn.

Zarkawt Serpents home crew Myn'X hi an la naupan hmel ṭhe ṭhaw a, an thothâng pawh a ṭha a, an che vel a hmuhnawm. Mipa hlang an ni a, member hi paruk niin, kum 2013 Teachers' Day aṭang khan St. Paul's Higher Secondary School zirlaitena an din a ni. Veng hrang hranga mi an ni a, an member-te hi Ramchhana, B. Hruaia, Sangzela, Kimkima, Ruatdika leh Lalremsiama te an ni. Hip-Hop style an hmang ber a, MSL tir lamah an che ṭha hle a, mahse an battle vawi thumna aṭangin an hnufual hret a, ṭan an la leh a, final an rawn theng ta. An lâm a hmuhnawm leh hle ang.

Nerds of War hi Khatla TBL home crew an ni a, Myn'X ang lo deuhin mipa leh hmeichhe inpawlh an ni thung. Mipa pahnih an awm a, Jammy leh Immanuela te an ni a, hmeichhia pahnih bawk niin, Angela Khuma leh Naom Chhangte te an ni. Style lamah chuan style hrang hrang an hmang nasa a, an thiam em em vek emaw tih tur an ni. Hip Hop, Jazz, Contemporary, Afro leh Ballroom te an thiam em em vek mai. A hmain lam ho ṭhin ni lo mah se an size rual khai tak leh an fit avang hian an hmuhnawm. Bul an ṭan ṭha a, a tawp an zo ṭha ang em? Zanin a chhanna kan hmu ang.