LBS Suzuki Youth Icon: Youth Icon 2024 Lalsangliana

LBS Suzuki Youth Icon 2024 thlanna chu a hmawr bawk a ni ta, Youth Icon 2024 atan Bawktlang tlangval, Lalsangliana (Taitea) thlan a ni.

Youth Icon 2024 Lalsangliana hian lawmmanah pawisa fai, Rs nuai 2 leh trophy a dawng a, hei bakah hian Suzuki Burgman leh Bosch Washing Machine a dawng a, thilpek dang ṭhahnem tak a dawng bawk.

Pahnihna Peter Lalnunpuia, College Veng niin lawmmanah Rs nuai 1, trophy leh Bosch Washing Machine l a dawng a, pathumna Lalbiakkima Hnamte, Thentlang chuan Rs 70,000, trophy leh Bosch Washing Machine a dawng. Top 10-a tling ten Rs 10,000 ṭheuh an dawng bawk a ni.

October 19, 2024 zan khan LPS Arena, Falkland-ah grand finale hi neih a ni a, a hmuna chhimtu an ṭhahnem hle. Show hmuhnawm tak neih niin, Top 3 te bakah Top 5-a tling J.Lalrosanga, Samson Lalhunruata leh Ramengmawia te an zai a, anni bakah Lalrempuia (2012), Zomuanpuii (2019), K. Lalthlamuankimi (2016) leh Vanlalhmangaiha te an inlan bawk.

Youth Icon 2024 Lalsangliana hi Vanlaldika leh Vanramngaii te fapa niin, unau panga zinagah a naupang ber dawttu a ni. Zaithiam a nih bakah infiammi a ni bawk a, volleyball player ṭha tak a ni. Sunday School aṭangin a zai chho a, intihsiakna hrang hrangah pawh lo tel tawhin, Youth Icon 2019 leh MYC Perkkhuang 2021, Mizo Idol 2022 leh Zofa Lelte 2022 ah te pawh a lo tel tawh a ni.

A fan-ten J. Lalrosanga bike lei sak

Youth Icon 2024 intihsiaknaa thawm nei lian leh ṭantu ngah tak, J Lalrosanga chu a fan-ten pawisa thawhkhawmin Honda bike an an leisak.

J.Lalrosanga hian Top 4 a tling zo lo a, mahse tun ṭum intihsiakah boruak nei lian ber erawh a ni thung, Icon ngaihven hlawh tirtu pakhat a ni.

Amah ṭantuten WhatsApp group an siam pawh hi 10 chuang zet a awm. A fan-te pawisa thawhkhawm hi Rsa hian a hmain Muanna In Boys Home tan a lo hlan tawh bawk. Hemi hnu hian a fan-te hian an pawisa thawhkhawm hmangin Honda bike leisak lehin, Grand Finale zanah hian an hlan a ni.