US-ah Tenet a che ṭha fal

Kar tawp liam ta US Box Office chart-ah Tenet a che ṭha nghal hle a, sum lalut tam ber a ni nghal. The New Mutants chu pahnihna a ni a, Unhinged chu pathumna a ni bawk.

Tenet sum lakluh a tam fal

Christopher Nolan-a film Tenet chu khawvel ram dang eng emaw zatah tlangzarh a nih hnuah Ninga­ni liam ta khan US-ah tlangzarh a ni ve leh ta a, theatre 2,810 aṭangin $20,200,000 a lalut nghal. 

US-ah khuan theatre hi boruak pangngaia an hawn ṭhin zatve vel chiah an la hawng a, hri leng nasa takah Tenet-in hetiang zat sum a hailut thei hian mipuiin Tenet an ngaihhlut zia a tilang. 

John David Washington, Robert Pattinson leh Eliza­beth Debicki-te channa Tenet hi August 26 khan UK-ah premiere a ni a, hemi rual hian ram dang 41 velah tlangzarh nghal niin kar tawp liam ta thleng khan $mtd 146.2 vel a lalut tawh.

Tenet film-ah hian secret organisation 'Tenet' chuan Indopui III-na chhuak tur dan an tum a, film director zinga sulhnu nei ṭha ber pawl Nolan-a kut chhuak a ni bawk a, tlangzarh a nih hma aṭang tawh khan boruak a nei ngah hle. Film siamna atan hian $mtd 200 vel lai an hmang a, thlawhtheihna tak takte pawh he film-ah hian tihpuah a ni a, film lam tuipuitute tan chuan en chakawm tur tak pawh a ni. 

US-a tlangzarh a nih hma karah hian khawvel ram dang aṭangin $mtd 53.6 a lalut tawh a, budget hi kar loah an khum thuai dawn niin a lang, hri leng karah chuan tlangzarh lo phei se chu a sum lakluh a turu hle ang tih a rinawm.

Chart hmasaa pakhatna, film critics lam lawm hlawh em em lo The New Mutants chuan ngam loh an tawng a, pahnihnaa an din a ngai ve ta. Massie Williams channa hian theatre 2,754 aṭangin $2,925,000 an lalut a, Tenet nena an sum lakluh a inthlau tawh hle. Khawvel ramdang aṭanga a sum lakluh nen Tenet-in US-a a lakluh zat hi a khum hram chauh a ni.

Hripui leng vanga theatre tam ber khar a nih hnua film lian tham tlangzarh hmasa ber Unhinged chu pathumna a ni a, $1,780,000 a lalut.

Chart top 3-te hi theatre 2k chuangah vek an chhuah tawh a, US-ah chuan film industry a kal pangngaiin a kal chho leh mek tawh a ni. 

Kar tawpa chart an tihchhuahah khan top 8 chin chiah an tarlang a, Bill & Ted Face the Music chu palina niin The SpongeBob Movie: Sponge on the Run chu pangana a ni ve bawk.