India rama band battle lian ber 'Ticket to Hornbill' finale-ah Mizo band pahnih

25th Hornbill Festival, 2024 khuh hawnna atana Nagaland sorkar hnuaiah Task Force for Music and Arts huaihawt, India rama band battle lian ber, 'Ticket to Hornbill' grand finale-ah Mizo band pahnih, The Prophets leh Yugen an tling a, zaninah intihsiakna hi neih a ni ang.

Band intihsiaknaa pakhatna hian lawmman Rs nuai 20 an dawng dawn a, pahnihnain Rs nuai 10 leh pathumnain Rs nuai 5 an dawng dawn a ni. Hei bakah mimal lawmman atan musical instrument an sem dawn bawk a, an lawmman sem tur hi Rs nuai 5 hu vel a ni bawk.

'Ticket to Hornbill' a live performance round hi October 18 leh 19 khan neih a ni a, he round-a tel tur hian band 30 thlitfim an ni. Heng band-te hi Nagaland, Delhi, Karnataka, West Bengal, Mizoram, Meghalaya,Assam, Maharashtra, Sikkim, Jharkhand, Arunachal Pradesh, Manipur leh Uttar Pradesh amite an ni.

An zing aṭang hian final thleng turin band pasarih thlan an ni a, heng bakah hian a huaihawttuten wildcard hmangin band pathum an dah belh leh. Band 10 te hi final-ah hian an inel dawn ta a ni.