PUBG India: PUBG Corporation kutah awm dawn
Players Unknown Battleground (PUBG) Corporation chuan India ram bikah chuan PUBG Mobile thuneihna Shenzhen-based Tencent Games hnena awm chu an kutah an la tawh dawn tih Thawhṭanni khan thuhchhuah siamin company chuan an tarlang.
Kar hmasa khan PUBG Mobile hi India sorkar chuan a ramchhungah khap a nih thu a tarlang a, hemi a nih avang hian PUBG Corporation chuan China company kuta awm tawh lo hian India ram bikah chuan an kutah an la dawn tih hi an tarlang ta a ni.
India sorkarin China kaihhnawih application 118 a 'ban' tur kar hmasa Nilainia a tihchhuah zingah khan PUBG Mobile hi a tel a, hei hian India rama he game khel ṭhin mi tam tak a tichiai hle a ni. Tunah chuan App Store leh Playstore lamah pawh download tur a awm tawh lo a, a game erawh an la khelh chhunzawm thei tho thung. Mahse hetichung hian Mizo zinga he game khel ṭhinte chuan Korean Version an download leh mai ṭhin niin, PUBG khel ṭhin pakhat chuan Vanglaini a hrilh a, Korean Version hi Global version nen danglamna a awm lo tih leh; server kha Asia-ah an set mai ṭhin thu a sawi. Korean version erawh hi chu Playstore-ah a awm lo a, site dang aṭangin an download ṭhin tih a sawi bawk.
Tencent lam pawh hian kar hmasaa India-in a ram chhunga an app a khap hnu lawk khan India thuneitute an biak dawn thu an sawi nghal a, India ramah an application hman leh a nih theih nan theihtawp an chhuah dawn tih an sawi. Mahse Thawhṭannia PUBG Corp. thuchhuah aṭanga a lan dan hi chuan Tencent hian India ram bikah chuan an enkawl chhunzawm rih dawn lo niin a lang.
"Kan hmalakna hi India mahnia ro a inrelna leh a inpumkhatna, India humhimna leh venhimna ngaihtuahna vang a ni," tiin sorkar laipui chuan thuhchhuah an siamah PUBG an ban chhan hi an lo tarlang tawh a, India leh China hi ramri chungchangah tunhnaiah vawi eng emaw zat an intihbuai avangin China application tam tak chu India hian a khap tawh a, chung zingah chuan TikTok leh UC Browser-te pawh a tel a ni.