JUDAS PRIEST chanchin ziahna Judas Priest - 50 Heavy Metal Years

Judas Priest leh  Rufus Publications chuan Judas Priest official lehkhabu hmasa ber an tlangzarh dawn tih an sawi.

An lehkhabu tihchhuah tur hi "Judas Priest - 50 Heavy Metal Years" tiin, kum 50 chhunga an band chanchin hrang hrang inziahna a ni dawn a; David Silver, Ross Halfin leh Jayne Andrews-te chuan lehkhabua tarlan tur hi an lakhawm a ni.

Khawvela heavy metal hlawhtling ber zinga mi, Judas Priest-te chanchin ziahna lehkhabu hi phek 648 laia chhah a ni dawn a, an chanchin mi la hriat ngai loh leh thlalak thulkhung vantlang hmaa an la phawrh ngai lohte chu he lehkhabuah hian an tarlang dawn. Halfin, Neil Zlozower, Mark Weiss, Fin Costello leh Oliver Halfin-te thlalak miin an la hmuh zen zen lohte pawh an zep tel dawn tih an tarlang tawh bawk.

Judas Priest hi English band an ni a, kum 1969-a indin daih tawh kha niin an album pawh khawvel ram hrang hrangah copy maktaduai 50 chuang zet an hralh tawh a; khawvela metal band ropui an sawi zingah an hming hi hmaih a ni ngai meuh lo.