Mammoth ral chhan ngaihdan thar

Ice Age film-a kan hmuh, sai chi khat, hmul ngah tak, Mammoth te kha an mangna chhan pakhatah tui in tur an neih loh vang niin scientist-te chuan an sawi.

Alaska vaukam hnaiha thliarkar pakhatah, hmun danga mammoth an thih zawh tawh hnu thleng pawhin mammoth hi an la awm a; heng mammoth te pawh kum 5600 kalta khan an mang ve leh a ni. He thliarkara mammoth an mang ve lehna chhan chu tui in tur an neih loh vang niin mithiamte chuan an ngai.

St. Paul thliarkar, Bering Sea-a mammoth te thih zawhna chhan hi National Academy of Sciences chuan a chhui a, uluk taka an zirchian hnuah tui thianghlim in tur a awm loh avanga thi nia ngaih a ni. Pennsylvania State University-a professor, Russell Graham chuan khawvel lum zelah vur a tui a, tuipui chim chin a sang a, he thliarkar pawh hi a tÍt phah niin a sawi. Hetiang a nih avang hian dil tui in theih pangngai chu tuifinriat tui alin a chÓm a, in tlak a nih loh phah niin a sawi bawk. Hei bakah, tunlaia sai tena ni khata tui an in ṭhin, litre 70 aṭanga 200 ang an in anga chhutin, tui an mamawh hnem a, an tui tlanin a daih tawh lo niin mithiamte chuan an sawi. Mammoth te hian an ei tur hi thing hnah leh hnim a ni a, a zung nen lama an pawh chhuah ṭhin avangin ram an tichhia a, leiin ruahtui a khawl theih loh phah niin an sawi bawk.

Mammoth te hi sai chi khat, hmul ngah tak an ni a, African saite ai chuan Asian saite nen an pianhmang a inang zawk a ni. Mammoth sai dam hnuhnung ber nia ngaih chu Siberia hmarchhak lama Wrangel thliarkarah a ni a, BC 2000 vel thleng khan he thliarkarah hian an la dam a ni. Hmun hrang hrangah an mang chhan hi a inang lo ṭhin a, a chhan lian berte zingah chuan mihringtena an pel ṭhin vang te, khawvel lum zel vangte a ni.