Music Domain Mizoram (MDM) in huang zauh zel

Music Domain Mizoram chuan Aizawl-ah General Headquarters neiin an huang an zauh zel a. MDM Lunglei District Headquarters chu 26.8 2022 a an din hnuah MDM Serchhip District Headquarters chu 18.10.2024 (Zirtawpni) khan an hawng leh. MDM Lawngtlai District Headquarters hawng turin an inbuatsaih mek bawk a. District dangah pawh huang zauh zel an tum.

October 18, 2024 zan khan Serchhip Auditorium-ah MDM Serchhip District Headquarters hawngin tunlai zaithiam lar tak tak te nen hun an hmang a, free Concert an nei chhunzawm nghal bawk.

MDM Serchhip District Headquarters hawngtu B. Lalsawmzuala (Tea Boitlung), Sr. Vice President MDM chuan Mizoramah Music-in nasa takin hma a sawn a, Music Industry mumal kan la nei thei lo erawh a pawi a tih thu a sawi. MDM hian zaithiamte tan theihtawp chhuahin Mizoram-a Music Library awmchhun a enkawl mek a. MDM din hnu aṭangin zaithiamte hnena Royalty (sumfai) semchhuah pawh cheng nuai 70 chuang a tling tawh niin a sawi.

MDM hian Music Video Library changtlung tak neiin IDBI Bank hnuai, Chanmari, Aizawl-ah Office neiin dawr theih reng an ni. Zaithiamte tana hamthatna tur ngaihtuahin Multiple Streaming App 'Thulkhung' a nei bawk a, International Payment Gateway buaipui mekin duhthusama ṭha a buatsaih mek a ni a, movie leh a kaihhnawih, Music Videos leh Audio zawrhna platform ṭha tak a ni dawn a ni.