Box Office: 'Smile 2' a che ṭha ber

North American box office-ah 2022 pyschological thriller, 'Smile' chhunzawmna, 'Smile 2' a che ṭha ber a, tlangzarh karah USD mtd 23 a la lut. He film-ah Naomi Scott chu pop singer-ah a chang a ni.

R-rated sequel hi Parker Finn direct niin, budget hi USD mtd 28 a ni. North America-a USD mtd 23 a hmuh nen, khawvel puma a kar khatnaa a sum hmuh chhuah hi USD mtd 46 a tling. Audience lam pawhin an fak a, CinemaScore-ah 'B' grade a hmu a ni. A film hmasa, 'Smile' khan tlangzarh karah USD mtd 22.6 hmuin, khawvel puma a sum lak luh hi USD mtd 217 a tling.

'The Wild Robot' chuan a kar linaah USD mtd 10.1 la hmuh belhin No 2-ah a awm. Peter Brown-a naupang lehkhabu behchhana siam, animation hian North America-ah USD 101.7 a la lut tawh a ni. Horror movie, 'Terrifier 3' chu No 3-ah awmin, USD mtd 9.3 a lak luh belh leh bawk a, domestic-ah USD mtd 36.2 la lut tawhin, he low-budget film hian 'Terrifier 2' sum lak luh a khum tawh a ni.

Thawm nei lian tak, beisei pha ta lo "Joker: Folie a Deux" chu a kar thumnaah No 6-ah a tla thla der tawh, USD mtd 2.2 la lutin, North America-a a sum hmuh chhuah hi USD mtd 56.4 a ni a, a original film a pha lo hle.

Top 5-a hian USD mtd 5 la luttu, 'Beetlejuice Beetlejuice' leh romantic tearjeker film, 'We Live in Time' te an lang bawk.