Aguilera-in high heels a bun nasat vangin a khup ruh a na

Grammy award ṭum nga lo la tawh, pop star Christina Aguilera chuan a perform ṭhinnaah kum tam tak chhung pheikhawk sang tak hlir a bun ṭhin avangin a khup leh a ke ten an tuar a, a ti khaw lo tawh niin a sawi.

English singer-songwriter Raye-i'n Rolling Stone magazine tana a kawmnaah Aguilera chuan hemi chungchang hi sawi chhuakin, pop artist a nih anga a pawi tih zingah chuan stage-a pheikhawk sang bun loha inringtawk taka a awm thei lo chu niin a sawi. Raye chu pheikhawk bun loa a perform mai theih ṭhin avangin a fak thu a sawi a, kum tam tak pheikhawk sang a bun ṭhin chu a khup leh a ke chuan an tuar a, a khup ruh pawh a nat phah niin a sawi. Kum 2000 chho vela hmeichhe pop star nih chu a hautakin, a pianphung leh inchei danahte sawisel an tawk nasa hle tih a sawi a, mahse midangten a pianhmang chungchang an lo sawite chu engah mah a ngai tawh lo tih a sawi bawk.