Music video Ṭhat zual tawhnaah Tunge Best Music Video la ang?

A kum têlin music video siam kan uluk tial tial a, intihsiakna lian tham a ni tawh a, kan zaithiamho music video pawh a ṭha tawh hlawm hle. Ṭhazual Awards sem tura Roro Polymers Best Music Video thlan chhuah tur atan pawh hian an ṭha hlawm a, nominee zing aṭang pawh hian thlan chhuah nalh a har khawp ang.

Roro Polymers Best Music Video-ah hian Chris MS Dawngkima video, Kawng Min Hawn Ru tih a lang a, Fiona Pachuau video 'A hnen rawn pan la', Essy hla 'Inchhuang mai lo la', TBC Zaithanpuia hla 'Isu ka hmangaih che', tih leh Mawitei hla 'Ka thlang ber zel ang che' tihte a awm.

Chris MS Dawngkima hi a hla 'Kawng min hawn ru' tih hmang tho hian Rin Rin Best Male Artist (Gospel)-ah a lang bawk. He hla hi nikum chhung khan Ṭhazualah vawi 12 ngawt a lang a, pakhatna vawi hnih a hauh a, pahnihna vawi hnih, pathumna vawi khat, palina vawi khat leh pangana vawi thum ngawt a hauh bawk. A music video hi a ṭha a, en a nuam hle.

Fiona Pachuau hi tun Ṭhazual Awards sem turah hian he category-ah chauh hian a lang a, tuna a hla 'A hnen rawn pan la' tih hi Ṭhazual chart-ah vawi li a lang a, pariatna vawi hnih lah pasarihnaah vawi hnih a lang. Tuna a lanna hla hi Parema hla phuah khungkhawmna, 'Ka Rinchhan Lalpa' album-a mi a ni; a music video hmuh a nuam khawp mai bawk. Pakhatna la thei tur zingah chuan a âwm viau a ni.

'Ka Rinchhan Lalpa' album-a mi bawk, Mawitei sak 'Ka thlang ber zel ang che' tih hla hi a ṭha a, a video pawh sawiselna tur a tam lo ang. He hla hi Ṭhazual chart-ah vawi 13 zet a lang thei a ni. Chung zingah chuan vawi thum chu pakhatna dinhmunah a ni a, pahnihnaah ṭhut phahah ṭum hnih a ṭhu bawk. Hla hlawhtling leh ṭha pawl tak a ni hrim hrim. Ani hi National Business Enterprise Best Female Artist (Gospel)-ah he hla hmang vek hian a lang.

Tunlaia huhang ngah tak, Essy hla hit 'Inchhung mai lo la' tih hla hmang hian Essy hi MD Enterprise Best New Artist-ah a lang bawk. He hla hi nikum chhung khan Ṭhazual Chart-ah ṭum sarih ngawt a lang hman a, kuminah pawh kumtir lam khan a lang chhunzawm a ni. Nikum khan pakhatna a hauh hman lo.

TBC Zaithanpuia hian hla hit a ngah a, a video ang zawng pawhin a music video te a ṭha hlawm em em. 'Isu ka hmangaih che' tih hla hi nikum chhunga Ṭhazual chart-a lang hnem berte zinga mi a ni ngei ang. Ṭum 18 ngawt a lang a, pakhatna pawh ṭum hnih lai a hauhpui thei. Pahnihnaah ṭum hnih a awm a, pathumnaah ṭum thum ngawt a awm bawk. TBC Zaithanpuia hi a hla dang 'Fak zel che ka duh' tih hla hmangin Rin Rin Best Male Artist (Gospel)-ah a lang bawk a, he category-ah tho hian Chris MS Dawngkima nen an awm dun a ni.