MSL Best Dance Crew Nerds of War

MSL Halftime Dance Battle Feb­ruary thla aṭanga neih ṭan chu, May 1, Zirtawpni zan khan a hmawr bawk a ni. Hetah hian Khatla TBL Home Crew Nerds of War te chu MSL Season 1 Best Dance Crew atan puan an ni. He Final dance battle hi a hmuhnawm hle a, Zarkawt Serpents Home Crew Myn’X leh Khatla TBL Home Crew Nerds of War te an inhmachhawn a, an pahnih hian an thiam a, an inhneh tawk hle.

Myn’X vs Nerds of War

He Halftime Dance Battle hi round hnih a ṭhen niin, Zarkawt Serpents home crew Myn'X-in an rawn ṭan a, anni hi costume lam an rawn bei mawi hle a, LED lights an costume tluana vuahin, an rawn lam ṭan a, mipui lawm pawh an hlawh a, mit a tlai em em. Hip Hop leh animation te hmangin choreography mawi tak an rawn phochhuak. Nerds of War an rawn lut ve leh a, anni hian trick mawi tak mai an rawn bei lut nghal a, hip hop choreo-a chhunzawmin an energy a rawn sang hle. An team work ṭha tak nen an rawn ding che ṭha hle a ni.

Round 2 ṭannaah, Myn’X lamin an rawn attack ve leh thung a, an signature move te rawn hmangin, an synchronization pawh a ṭha hle. Nerds of War lamin a khar nan, anmahni thiamna - Salsa leh ballroom partnering har tak tak an rawn dahchhuak leh a; an fitness level sanzia an rawn lantir a, boruakah te an invai vir lawp lawp. An theihtawp tak tak an rawn chhuah ve ve a ni. An point pawh inthlau lo hle a, Myn’X hian lights creative takin rawn hmang mah se, dance battle a nihna laiah, steps execution ṭha tawk lo lai a awm zeuh ṭhin. Nerds of War energy sang tak chu an hneh zo ta lo a ni. Best Dance Crew hian Trophy leh Rs. 10000 a keng tel a, Runner up hian Rs. 5000 leh Trophy a keng tel thung.

Nerds of War hi MSL Dance Battle atan liau liaua indin an ni a, mahse mimal erawh chuan lâm ṭhang sa an ni vek. Angela Khuma leh Naom te hi Zoramchhani music video-a lo lâm tawh an ni a, an member dang Jammy leh Naom vek hi Mara music video-ah an lo lam tawh bawk. School leh college kal lai an nih hlawm avangin duh angin inbuatsaih hun an nei tawk lo deuh; hei vang tho hian Nerds of War hi an crew pangngai ang chuan an chhunzawm zel lo ang a, sawm duh te tan erawh an lamho thei zel dawn.

Myn'X hi a hma aṭangin mumal taka lo ding tawh a ni a, Best Dance Crew ni zo lo mah se hun an crew hi an la kal zel dawn. A hmain crew ang hian vawi nga lai an lo lam tawh a ni. Competition zawng chuan MSL hi an tel hmasakna ber a ni.

MSL Finale: Special Performance

Final show hawn nan hian MSL-a tel dance crew te chu an vaiin an rawn lam a, ‘Revolution’ tia vuah niin, dance style hrang hrang Contemporary, Hip Hop Animation, Krump, B-boying, Jazz leh Mizo hnam lam Khuallam te telh a ni. Dancers 40 chuang chuan an thiamna hrang hrang he opening performance-ah hian an rawn entir a, Alan Lalrinawma, choreography a ni. Ani hi Faklam intihsiaka thiam ber, KṬP Ramthar Veng Branch-a an choreographer kha a ni.

Hemi hnu hian Khatla TBL leh Zarkawt BCA Cheer leaders ten lam hmuhnawm tak an rawn entir ve ve a, an thiamin, a class pawh a sang hle. Tun ṭum hian Best Cheer­leaders thlan ni rih lo mah se, Season 2 aṭang chuan thlan ngei an tum tawh thu MSL lam chuan an sawi. Match a inṭan a, Halftime Dance Battle neih hmain, final lut club te aiawhin, TBL Away Crew Lay Up leh BCA Home Crew Emerge ten an nei. Emerge hi internet lam kaltlanga mipui lawm hlawh ber, People’s Choice-a thlan an ni. He performance hi judge Alan Lalrinawma ṭannin, Lay Up leh Emerge-in an choreography an rawn entir ve ve a, Final Dance Battle-in a zui nghal a ni. Third quarter-ah Judge Nutei Pautu leh a partner Steve Lalruatkima te an rawn lam ve leh thung. Anni hi MZU Got to Dance-ah pawh lo chak fo tawh an ni.