Windows 10 chinah chuan browser dang

Computer-a operating system-a Microsoft kutchhuak Windows i hman chuan web browser-ah Internet Explorer a awm nghal ṭhin a nih kha. Mahse Windows 10 chinah chuan Microsoft kutchhuak ngei, browser hranpa a awm tawh dawn.

Project Spartan tia an hriat ṭhin, a hming tak, Microsoft Edge chu Windows 10 aṭang chuan default browser a ni tawh dawn a, Internet Explorer hlutna nasa takin a hniam phah a rinawm viau. Tunah pawh hian Mozilla Firefox leh Google Chrome te an lar chak a, a kawppui ber, Windows OS ten browser dang an hman leh si chuan hmangtu a neih tlem hle rin a ni.

Microsoft Edge chungchang hi Nilainia developer-ten conference an neihah Microsoft chuan an sawi chhuak a, a hming tur tak pawh hi an puang nghal a ni. He browser-ah hian browser danga kan hmuh ngai loh layout danglam leh hman nuam tak tak a awm dawn niin an sawi. A bikin tab thar hawn chungchangah te, website tlawh ngun deuh thumbnail-a a lan dan turah te, web app leh personalisation-ah te hman nuam leh awlsam tura duan niin an sawi bawk.

He browser thar hman chhin i duh chuan Windows 10 Technical Preview (Build 10105) run ve a ngai ang.