Mayweather leh Pacman A chhehvel a ngaihnawm

Keini tana Pathianni zing, anni tana Inrinni zan tir lama Money Mayweather leh Manny Pacquiao te inhnek khawvelin a ngaihven a thlir nasa. A hmunah mi lar tak takin an en nasa a, fiamthu thiam hmingthang Jimmy Kimmel-a lemchan pawh kan hmu.

Hun dang ni ta se, hmun dang ni bawk se, Justin Bieber kha photographer hoin an bawr luai luai tur a ni a, nimin zing erawh kha chuan tu khaw khain an ngaihven lo, a aia ropui Mayweather hnung a rawn zui ve mai mai a, a sam a khuih pial em em zui. Pacman-a lamah Jimmy Kimmel a rawn lang thung. Ani hi comedian lar a ni a, Jimmy Kimmel Live pawh America-a TV show an ngaihhlut a ni. Justin Bieber inchei ṭhin dan ang chiaha incheiin, lukhum parh nen, a rawn kal su ve hluau hluau a nih kha; a nui duh miah lo! Actor zinga Kristian ṭha em em Mark Wahlberg-an Pacman a rawn thlawp. Wahlberg a khawngaihthlak hle; Pacman chak leh chak lohah P. Diddy nen dollar 250,000 zet an inchawi a, Mark Wahlberg hian a chawi ta zawk.

Entu an hraw hlawm hle a, chung zingah chuan Paris Hilton pawh TV-in an thlir bing zingah a tel. Lewis Hamilton pawhin a hmunah a thlir ngei a, Jay Z leh a nupui Beyonce pawh an tel, 50 Cent pawh a ṭhu a, Ben Affleck pawhin khunkhân deuhin a hmunah a thlir bawk. Mike Tyson, Jake Gyllenhaal, Nicki Minaj leh Denzel Washington te, Michael Jordan leh boxer tho Amir Khan te hmuh theih langsar zinga mi an ni.

An inhnek hma zan khan engtin nge hun an hman? Mayweather chuan a mini-mansion chhungah an inhnek dan tur khûn takin a ngaihtuah a, Pacman erawh chuan Bible study class a kal thung. An inhnek zawh a, Pacman a chak loh hnu hian Pacman chuan Mayweather chu Bible study class-a kal ve turin a sawm a ni. Hriat mai maiah, Pacman hian tui vâwt a in ngai lo a, room temperature ang hua dai emaw, chu aia lum lam hret a in zawk ṭhin. Pacman hian an inbeih hma khan press conference-ah, "Pathianin chakna min pek hmangin he dinhmun hi ka thleng a ni. Thil hrang hrang ka paltlang tawh a; kawtthlera riak ve mai mai ṭhin, ei tur neih loh avanga rilṭam ngawih ngawih ṭhin kha hetiang dinhmunah hian Lalpan min chawisang a ni," a ti. "I nuna Isua Krista i neih a, nangmaha Pathian a lal ber tawh chuan he khawvel thil hi a pawimawh tawh lo a, thinlungah Pathian a pawimawh ber tawh ṭhin a ni," a ti bawk.

Pacman hian Mayweather chuan, "Zirlai ṭha tak zirtir ka duh a ni. Mi ṭha zawk leh mitena an entawn a nih theih dan tur zirtir ka duh. Pathian a awm a ni tih hriattir ka duh a, Pathian zahngaihna hmaah chuan kan inngaitlawm tur a ni tih hria se ka duh a ni," tiin Mayweather hi Bible study class-a kal tura a duhna chhan a sawi.