Zaninah Praise on 2024 Top 30 intihsiak

Central KṬP leh Synfo huaihawt mal zai intihsiakna, Praise on 2024 second round chu zanin, October 24, 2024 zan dar 7:30 aṭangin Saron Veng Kohhran Hall-ah neih a ni dawn a, naktuk zanah chhunzawm a ni ang.

Second round-ah mi 30 an tling a, hla pahnih hmangin an intihsiak dawn a ni. Zan khatnaah Mizo Lengkhawm hla hmanga intihsiak a ni ang a, zan hnihnaah mahni hla sak duh zawng an sa ang a, Music track hman a ni ang. Zan hnihna intihsiak zawhah hian Top 10 thlan chhuah result puan zui a ni dawn a ni.

Top 30 intihsiakna hi Live-in en theih a ni dawn a. Synod Information YouTube Channel leh Hruaina Eng TV (LPS 15 & Zonet 12)-ah te tihchhuah a ni ang.

Kum 2024 Praise On intihsiak hi Judge pathum - Upa F. Lalthanmawia, Bungkawn; Nl. R. Lalrinmawii (Arini), Leitan leh Pu Michael Lalneihtluanga, Mission Veng te bakah Guest Judge, Tv. H. Lalthazuala ten an endik thin a. Anni hian Audition atanga en dik ṭanin a tawp thlengin an endik dawn a ni.