THAZUAL LENGZEM: Kimkima 'Leikapui run ka bel' No.1 a ni

Ṭhazual Lengzem chart-ah  Kimkima hla thar ber 'Leikapui run ka bel' chu pakhatna a ni a, Rpa Ralte 'Strawberry' chu pahnihna niin Marina Varte 'Nang kher ka lo tawn che' chu pathumna a ni.

'Leikapui run ka bel' No.1 a ni

Kum 2019-a Ṭhazual award-a best male artist award dawngtu Kimkima hla thar ber 'Leikapui run ka bel' pakhatna a ni hi mak ti an awmin a rinawm loh.

 

Kimkima hla a nih chuan hit tura ngaih sa a ni a, vawi duai lo Ṭhazual chart-a a hla No.1 lo nihpui tawhtu Kimkima hla mawi tak chart topper a ni hi a awm viau. He hla hi a tihchhuah hnu lawk aṭang khan Ṭhazual chart-ah lang nghalin hma a sawn chak hle a, tunah chuan No.1 hial a rawn inhlangkai leh ta der a ni.

 

'Leikapui run ka bel' music video hi thla khat chhung velin YouTube-ah thlirtu maktaduai thum chuang an awm tawh a, hei hian ngaihthlak a hlawh zia chu a tilang chiang hle.

 

Pahnihna Rpa Ralte 'Strawberry' 

Ṭhazual Award 2020-a best songwriter lengzem award dawng thei Rpa Ralte chuan a hla 'Strawberry' chu pahnihna a rawn nihpui ta a, dinhmun ṭha bera ding thei tur pawhin a hmabak a eng hlein a lang. A hla ngaihthlak a hahdam bakah music video a hmuhnawm a, pakhatna a nih pawhin a mak lo ang.

 

Mizo Idol star Marina Varte 'Nang kher ka lo tawn che' chu pathumna a ni thung a, ani hi tunhnaiah folk song lamah insawrbing deuh mah se lengzem hla lungkuai tak nen thla khat vel liam taah khan 'Nang kher ka lo tawn che' a rawn inlan leh a ni.

 

Ṭhazual chart an ṭha zual

Ṭhazual lengzem chart top 10-a rawn lang phate hi an ṭha rual hle a, Ṭhazual award sem zawh chiaha award latu leh nominee-te an kat nuk hlawm.

 

Lengzem artist hmeichhe zinga langsar ber pawl Feli Fanai' Chhing mittui a hul zo ta' chu palina niin KR Rober ft Tuaisiala 'Ka Lalnu' chu pangana a ni.

 

Top 10-ah hian Awmtea Polymer ft Ramrami, Sangkimi Khiangte, Ngurthansanga, Ṭhazual best female artist lengzem Jaui leh best duo/group award dawngtu Essy ft. JT Production-te pawh an la awm a ni.