Essy A dinhmun a la Ṭha rih zel

Ṭhazual Awards-a MD enterprise Best New Artist (Lengzem) category leh Roro Polymers Best Music Video-a nominee Essy chu Zoram Electrical Store Ṭhazual Lengzemah pakhatna a rawn hauh leh. Tun hi a vawi hnih hauhna a ni.

March 9 aṭanga chart-a rawn lang ṭan, Essy hla 'Hey' hi a hla hit chho zel a, a kal vanglai a ni mekin a lang. Chart-ah pathumnaah bul a rawn ṭan a, pakhatna rin aiin a ni har zawk deuh hlek a, pakhatnaah hian a cham rei thei ang em tih hriat a har rih viau a, mahse pakhatnaa châm rei thei turin Essy a zaithiam a, a hla a ṭha a, a music video en a nuam bawk.

C. Sanga chu pahnihnaah a rawn invawrh chho ta. A hma khan pathumnaah a awm a, a chhingkhual lênmawii hi a mawi ber dawn a nih hmel khawp mai. C. Sanga hi a hmain pangana aṭangin pathumnaah a chho a, pathumnaa ṭum hnih a awm hnuah pahnihnaah a rawn chho ta a ni.

A hmaa pahnihna, tuna pathumnaa chhuk ta J. Lalremruati hi a rawn come back ropui khawp mai. Hun eng emaw chen Zo rimawi khawvelah a thawm kan hriat tawh loh hnuah a rawn lang leh a, pakhatna a rawn hauh awn awn a ni. Tunah hian a tawlh liam ṭan mek a nih hmel a, pahnihna aṭangin pathumnaah a chhuk thla ta a ni.

Zoram Electrical Store Ṭhazual Lengzemah hian mi thar pathum kan hmu a, pakhat chu Joseph Fanai leh Tetea te zai, Nuimawite chu a rawn lang thar. Hei bakah hian hman ni lawka Famkimi Kawlni music video thar 'Ka ngai em che' tih chu a rawn lang thar bawk. Heng hla pahnih hi hla ṭha tak leh mawi tak ve ve an ni a, dinhmun ropui zawk pawh an phuin a lang. Raymond Lalhriatpuia Chhangte music video thar 'Hmanlai chang tur' tih chu a rawn lang thar. Ani hi a hma pawha hlawhtlinna lo chang tawh a ni a, a kal zel turah ngai ang.

A hmaa top 10-a lang zingah Sumeona 'Ka bang ngei ang' tih kan hmu ta lo a, a tawlh liam ta. Ani bakah hian Christy hla pakhat zawk 'Chhingkhual di' a chhuak a, Henry Lalmalsawma Renthlei hla 'Lokir rawh' pawh a chhuak ta bawk.

Zoram Electrical Store Ṭhazual Lengzem

1 Essy - Hey

2 C Sanga - Chhingkhual Lenmawi

3 J. Lalremruati - Inhrilh dun ang

4 Christy - Tleitiri

5 Lawmi Khiangte - Mangtha

6 Thiamchantira - Lokir rawh

7 Raymond Lalhriatpuia Chhangte - Hmanlai chang tur

8 Famkimi Kawlni - Ka ngai em che

9 Kolkata Mizo Student - Kan ding (Zoram tan)

10 Joseph Fanai feat Tetea - Nuimawite