China box office: 'Venom 3' in 'Deadpool & Wolverine' a khum

Tom Hardy channa, 'Venom: The Last Dance' chu China box office-ah a che ṭha nghal hle a, tlangzarh nia sum lak luh tam lamah 'Deadpool & Wolverine' a khum.

Venom 3 hi vawiin hian US leh hmun dangah tlangzarh a ni dawn a, mahse hemi hma hian ram ṭhenkhatah tih chhuah hmasak niin heng zingah hian China pawh a tel. China-ah hian Nilaini, October 23,2024 khan theatre-ah an ti chhuak a, a installment hmasate tluk pha chiah lo mah se a che tha nghal hle.

Venom film hmasa ber khan China-ah hian tlangzarh niin USD mtd 34.9 a la lut thei a ni. Mahse Covid-19 hri len hnuah tlangzarh nia hetiang zat sum la lut thei hi an awm tawh lo. Venom 3 hian tlangzarh niah USD mtd 9.4 la lutin, USD mtd 8.6 la luttu 'Deadpool & Wolverine' a rawn khum a ni. 'Guardians of the Galaxy Vol. 3' khan ni khat niah USD mtd 7.4 a lo lut tawh bawk.

Venom 3 hi kumina Hollywood movie zingah China box office-a opening day a che ṭha ber dawttu a ni a, 'Godzilla x Kong: The New Empire' chu che ṭha ber niin USD mtd 13.4 a la lut.

Kelly Marcel direct, 'Venom: The Last Dance' hi Venom: Let There Be Carnage (2021) chhunzawmna niin, Sony Spider-Man Universe (sSU) film pangana leh, Venom trilogy film pathumna leh tawpna tur a ni. Tom Hardy chu Eddi Brock/Venom ni lehin Chiwetel Ejiofor, Juno Temple, Rhys Ifans, Peggy Lu, Alanna Ubach, leh Stephen Graham te an chang bawk. October 21, 2024 khan New York-a Regal Times Square theater-ah premier a ni. Vawiin hian US leh Canada-ah tlangzarhin, theater 4,125 ah chhuah a ni dawn a, tlangzarh karah hian USD mtd 65 vel la lut turin an chhut.