WhatsApp web aṭangin contact add theih dawn

Meta messaging service, WhatsApp chuan WhatsApp web leh Windows aṭangin contact add theih bakah, contact list te pawh siam rem theihna tur a siam thar.

A hma chuan WhatsApp contact hi mobile device-ah chauh add theih an ni ṭhin a, mahse tunah chuan Web and Windows aṭang pawhin an add theih tawh dawn a, hei hi phone-ah pawh automatic-in a in save ve nghal dawn a ni. He feature thar hi computer aṭanga WhatsApp khawih ṭhinte tan a ṭangkai dawn hle. Hei bakah hian WhatsApp hian contact save danah duh thlan theihna tur a siam dawn bawk. Contact ṭhenkhat, phone address book-a kan dah tel duh lohte chu direct-in WhatsApp chauh tan a save theih dawn a ni. WhatsApp hian privacy ṭha zawk siam zel a tum a, hemi atan hian phone number inpe kher loa username hmanga inbiak theih tura siam a tum bawk.