Zonet Arkaiden Zan : Albatross Zan

Zonet Arkaiden Zan vawi rukna chu zanin hian Dawrpui Multipurpose Hall-ah hman a ni leh dawn. Mizo band lar ṭhin, Albatross Zan hmangin an band pawh an inlan thei dawn e.

Host Zonuni Pachuau kaihhruaina hnuaiah Arkaiden Zan hi hman a ni leh ang. A hmuna chhim duh tan ticket tlem, Rs 100 man siam a ni. Zonet Zawlbuk, Zonet HD leh Zonet Empai app-ah live-a pek chhuah a ni bawk ang.

Mizo band kan neih ṭhat tak tak ten Albatross hla an rawn perform dawn a, perform turte hi - Boketto, Up up and Away, Rimawi Buk Band, The Radio, Soultee, Luv Band leh To Coda te an ni. Hun rei tak band anga an inlan tawh loh hnuah, Albatross band chuan 'Vanglai nun' an rawn perform dawn bawk.

Zanina Albatross Band hla an perform turte hi - Tunge, Chung Muvanlai, Min hlan lai kha, A mak a na, A dam ngei ang, A tlai em e, Duhaisam tikimtu, Hnam ropuite u, Riangvai, I tello chuan, Nghak zel ang che, Beisei bo, Lungrupui leh Lunglawm a kim thei lo tihte an ni.

Albatross band hi kum 1990-a din niin,Vanapa Hall-ah Otto band concert an open sak a, an band hming pawh an koh hma lawkin hall chhungah an phuah a ni. Kum 1991-ah an band hminga concert hmasa ber chu Vanapa Hall-ah hian an nei. A tir lamah chuan sap hla an cover ber a, genre hrang hrang - rock, blues bakah pop te pawh an cover ṭhin.

Band pual hian 1991, 1992 leh 1997 ah concert an nei a, a kar lakah concert hrang hrangah an tel bawk ṭhin. 1998-ah School of planning and Architecture, Delhi-ah sawm an nih angin an perform bawk. Hun eng emaw chen an chawlh hnuah kum 2013-ah Back on Track tour neiin Aizawl, Kolasib leh Lungleiah concert an nei.

Album hi kum 2001-ah an ti chhuak a, hetah hian sap hla paruk an phuah, an tih chhuah tak loh zinga pahnih, 'I tello chuan', leh 'Chung Muvanlai' chu Mizo ṭawnga letin an telh a ni. Kum 2001-ah music video hmasa ber, 'A dam ngei ang' chu LPS-ah an ti chhuak bawk a, Doordarshan-ah video pathum an siam bawk.

Kum 2000-ah album an buaipui laiin an original keyboardist Maenga a boral a, kum 2023-ah keyboardist Lianhminga a boral ve leh a ni. Lianhminga tribute concert tih lohah chuan zanin hi band anga an chet chhuah lehna hmasa ber tur a ni ang. Band member hi Rintea - Vocals, Hmingpuia- Lead Guitarist, Msa - Bassist leh David Ralte- Drums niin side project an nei hlawm bawk. Chungte chu Rintea - solo album leh Kneeling Band, Msa leh Lianhminga - Switch Band, Hmingpuia - Tone Zone Band leh Dave - Incarnation Band te a ni.