Grace-in a duh ang chiaha a siam 'Aw ropui ber' music video chu

A music video neitu berin a duh ang thlapa a siamtir, an buatsaih leh a lungawina ang chiaha tihpuitlin a nih chuan a chhe thei lo ang tih a lang reng. Grace-i music video thar hi chutiang chu a ni.

Mizo Idol, Grace Lalchhanhimi chuan a music video pahnihna a peihfel leh tawh a, zanin hian cable TV lamah chuan hmuh theih a ni tawh ang. He video hi Idol a nih hnua a music video pahnihna a ni a, a duh ang chiaha siam a nih avangin hmuh a chakawm lehzual hle a ni.

'Ka thinlung chelhtu' hmang­in Zonet Ṭhazual chart-ah hlawh­tlinna a chang awn awn a, tuna a music video thar hmang hian chart-ah hlawhtlinna a chan leh awn awn a beiseiawm. Grace-i video thar hi 'Aw ropui ber' a ni a, Parpuii Chawngthu phuah a ni. A thluk hi Kima Chhangte chuan a siam a, a video hi Tea kutchhuak a ni thung. Blue Waves-a an record a ni.

"A music, video leh hlate hi ka duh a, ka duh ang chiaha an siam a ni a, ka lawm hle a, keimah ngei pawh hian a rawn chhuah hun ka nghakhlel em em tawh a ni," a ti. "Pi Parpuii hla a ni a, a hnenah hian kalin a hla phuah zinga ka duh ber ka thlan a ni," a ti. "Tuna mi hi chu a hmaa ka hla nena khaikhin chuan a muang deuh a, tlêmin a tho lo zawk. Mahse a nalh ka ti a, a thu a ṭha ka ti bawk a, ka duh khawp mai," a ti.

Grace-i hla dang a buaipui leh mek a, he a hla buaipui hi Parpuii Chawngthu tho phuah a ni. Ruahman anga a kal thei a nih chuan tun thla tawp lamah emaw, June thla tir lamah emaw tihchhuah theih a inring. A hla hmasa, a music video hmasa ber chungchang Grace-i chuan sawi chhuakin, "Ka rin aiin ṭhalaiten an duh a, an ngaina a, Pathianin a hmang niin ka hre bawk. Khatiang taka a hlawhtling kha ka lawm em em a ni. Ka zai min ngaihhlutsaktu zawng zawngte chungah ka lawm em em a ni," a ti.

Tunlai hian Grace-i hi Aizawlah a awm tam zawk a, MJA khawm­pui hmangin Kolasib-ah a chhuk zawk ang a, a zai ang a, chumi hnuah Aizawlah a let leh ang. Music video dang a buaipui leh mek hi a zawh chuan a zirlai lamah a rilru a pe leh deuh ang a, thil dang vak buaipui rih loh a tum ang.