lal fanu thar hmingah 'Diana' an telh leh si

Lal chhungkaw ṭhian hnai takin Prince William-a fanu thar hmingah Diana tih telh an tum lo tih a sawi chhuak a, chanchinbu hrang hrangin an tarlan chuai chuai hnuah, Diana tih a tel leh si.

Duke leh Duchess of Cambridge, Prince William leh Kate Middleton te fanu thar hming hi Charlotte Elizabeth Diana a ni. Charlotte tih hi French hming a ni a, Charles tih nen awmze thuhmun niin, hmeichhe hming bik a ni. Lal chhungkuaah Charlotte tih hming pu an lo awm tawh ṭhin a, George III nupui kha a ni a, US-a Virginia-a Charlotte khua pawh hi George III nupui hming chawi a ni. Kum zabi 18-na laia mi kha a ni. Elizabeth hi chu a pi, Elizabeth II hming chawi a ni a, bakah, a nu, Kate Middleton-i hming laita a ni bawk. Diana hi a pi, William-a nu hming chawi a ni bawk.

Tuna Buckingham Palace an tih hi George III hian a nupui, Queen Charlotte tana kum 1761-a a lei kha a ni a, a tir chuan Queen's Palace tia koh leh hriat a ni ṭhin. A hnu zelah lal chhungkaw chenna ber a ni zui ta a ni. George leh Charlotte te hi a hmain an inhmu ngai lo a, George-a pu hi a thih thut avangin kum 22 mi lek niin George hi a lal a ngai ta sia, tichuan nupui tur an zawnsak a, Mecklenburg-Strelitz dynasty-a mi Charlotte hi nupuiah an bia a, an innei ta a ni. He inneihna avang hian Ireland pawh United Kingdom chhungah a awm phah. An nupa hian awmpui leh chhiahhlawh an nei ve dul lo a, nupa nun dik tak an hmang e, an ti ṭhin.

Tuna England lal chhungkua hi German thlah an ni a, an dynasty hming hi House of Windsor a ni. A hma chuan Saxe-Coburg and Gotha tih ṭhin a ni a, Indopui I laia German huatna avangin kha tih laia Kumpinu lal, George V chuan House of Windsor tiin a thlak a, tun thlengin he dynasty hmingah hian an hmang ta a ni.