Khiangte Construction Ṭhazual Gospel: Hlimhlimi 'Grep hrui tak' in hma a hruai

Gospel artist kan neih ṭhat, pasal fanau a neih hnu pawha a theih anga zai chhunzawm zel, Hlimhlimi chuan ama hla phuah ngei, 'Grep hrui tak' tih chu Khiangte Construction Ṭhazual Gospel chart tharah pakhatnaah a rawn lanpui ta.

Hlimhlimi hian a hla hi chart-ah hun eng emaw chen lanpui tawhin, hma a rawn sawn zel a, a chung ber dinhmun a rawn thleng ta a ni. He hla hi kum 2020 daih tawha a phuah niin, kumin August 31 khan a music video hi a ti chhuak a ni. Music hi Ephraim Malsawma, Muanpuia Renthlei, Reuben Lalnunzira leh Bruce Pachuau te remsak niin, HC Recording Studio-ah a record a, a video hi WoWv Production kutchhuak a ni. Harsatna, retheihna leh rilru dam lohna te a tawh karah, Pathian chuan a harsatna tawhte ni loin amah zawk a siamṭha a, a thil tawn hrang hrang a hmachhawn dan pawh a dang thei ta tih sawiin, he hla hmang hian Pathian chu mahni chauh pawha him taka min awmtir theitu a nih zia a rawn puang chhuak a, thiam leh nung tak maiin a rawn sa chhuak a ni.

Cindy Lalthanpuii'n Thartea hla lar ṭhin, 'Ka nghakhel' tih a sak chu No 2-ah a rawn chho bawk. Music video hi September thlaa a tih chhuah niin, music leh recording hi Studio 911 ah tiin, video hi Gabriel Graphics siam a ni. Gospel artist chhuak thar zingah hriat hlawh ber pawl, Dinsangi chuan To Coda a thawhpuina, 'Lalpa i fak ang' tih chu pathumnaah a lanpui a, Seraphic Choir 'Ka chhanna neihchhun' leh Vesper Vuite 'Ka thlamuanna Krista' tih chu Khiangte Construction Ṭhazual Gospel Top 5 ah lang bawk.

Chart tharah hian One in Christ, Teruati Tochhawng leh F. Lallawmawmi te an la lang chhunzawm a, hetih lai hian Zorinsanga Sailo leh C. Lalruatsangi te an rawn lang thar ve bawk a ni.