Box Office: Beisei angin 'Venom: The Last Dance' thawm a ring lo

Tom Hardy channa, 'Venom : The Last Dance' chu North American box office-ah No 1 ni mah se, fan-te beisei angin a thawm erawh a ring lo.

'Venom 3' hi tlangzarh karah theater 4,131-ah tih chhuah niin, a sum hmuh hi USD mtd 51 a ni a, tlangzarh kara USD mtd 65 la lut thei tura an lo chhut lawk chu a pha lo hle. Kum 2018-a tih chhuah 'Venom' khan tlangzarh karah USD mtd 80 la lutin, 2021 khan 'Venom : Let There Be Carnage' chuan kar khat chhungin USD mtd 90 a la lut bawk.

North America lamah beisei pha lo mah se, 'Venom 3' hi international audience lamah erawh a che ṭha viau thung a, USD mtd 124 a la lut a, khawvel huapa a sum lak luh hi USD mtd 175 a tlin theih phah a ni. Kelly Marcel direct, Venom trilogy final instalment hi October 24 khan tlangzarh niin, budget hi USD mtd 120 nia sawi a ni.

'Smile 2' chuan a kar hnihnaah USD mtd 9.4 lak luh belhin No 2 ah a awm a, domestic-a a sum hmuh chhuah hi USD mtd 40.7 a tling tawh. 'Conclave' chu tlangzarh karah No 3-ah rawn langin, theater 1,753 aṭangin USD mtd 6.5 a hmu chhuak.

Universal and DreamWorks Animation 'The Wild Robot' chu No 4-ah a tla thlaa, kar nganaah USD mtd 6.5 a la hmuh belh thei. No 5-ah A24 romantic drama, 'We Live in Time' awmin, USD mtd 4.8 a la lut ve bawk.