Feli Fanai video thar KA LIAM E

Ṭhazual chart-ah 'Ṭhen che ka hlau' hla hmangin ropuina a chang tawh a, Kyusho Waza nena an sak 'Khuanu Samsuih' a hlawhtling em em bawk. Heng a hlawhtlin tawhnaahte hian Feli Fanai chuan duh tâwk mai a tum lo a, Zo rimawi khawvelah duh tâwk mai a tum lo mai ni loin 'Ka liam e' tiin rimawi thar a rawn chhuah leh ta zawk a, beisei a sang a, ngaihthlak a chakawm tawh hle. Tunlai tak a nihna hi min pawttu a ni.

Ṭhen a hlauh thu a sak hnuah a liam tâk thuin a rawn chhilh leh daih a! Ṭhen loh theih loh a ni em ni? Feli Fanai hla thar hi 'Ka liam e' tih a ni a, chelh rual a ni ta lo a niang! He hla hi tunlaia hla phuahtu lar Myztic Sailo phuah a ni. Feli Fanaiin huhang a neih lenzia leh zai lama kan hriat larzia sawi a ngai lo a, a thiam. Myztic Sailo hla phuah a hit thei em em bawk; heng pahnihte inkawpin music an rawn chhawpchhuah hi a hit a rinawm viau.
Tunlaia music-a hit thei tak mai chu Hip-Hop leh R&B rawngkai a ni a, chutiang hla phuah lamah chuan Myztic Sailo hi a chhuanawm. Feli Fanai hla thar 'Ka liam e' tih hi chutiang lam, Hip-Hop leh R&B rawngkai a ni a, a ngaihnawm ang. Feli Fanai tan hetiang lam hla hi hla thar a ni lo a, Kyusho Waza nena an sak dun 'Khuanu Samsuih' kha hetiang lam genre hi a ni a, Michael FK nen 'Saltanna' tih hla an lo sa tawh bawk. Mahse tuna mi hi chu ama solo liau liau a ni.
"Keimah hian, solo hian music video ka nei khat ta hle a, nikum hmasaa ka album tihchhuaha mi kha a ni mai; nikum chhung khan ka single video pakhat mah a awm lo. Tuna ka hla thar hi kum hnih chhunga solo-a ka music video chhuak hmasa ber tur a ni," tiin Feli Fanai chuan a sawi. Music video a tihchhuah takah chuan album lam siam leh te a rilruk em tih zawhna chu Feli Fanai chuan "Tunah chuan ka rilruk rih tawh lem lo. Mahse music video thar erawh tihchhuah leh thuai ka tum. Video tihchhuah ka tum hi Anggu's Collection Vol. 1-a mi tur a ni," a ti.
Feli Fanai hi a zin nasa a, a zai nasa a, a taksa pawh a chau hle. Nimin khan Serchhip-ah an kal a, vawiin hian Aizawlah a kir leh ang a; hetiang deuh renga Mizoram hmun hrang hranga zin chhuak a nih avangin a taksa a chau a, a chang chuan drip khai chungin a hun a hman lawp lawp a ngai.