Zack Snyder's 'Justice League'-ah Jared Leto 'Joker' nui hmel kan hmu leh dawn!

Khawthlang entertain­ment media lian Variety leh Hollywood Reporter lam report tihchhuah hi thudik a nih chuan Zack Snyder's 'Justice League' nakkuma tihchhuah turah Jared Leto 'Joker' kan hmu dawn.

Zack Snyder's 'Justice League' cut nakkuma tih­chhuah tur chungchang hi media hrang hrangah vawi tam tarlan a lo ni tawh a, a khat tawkin chanchin 'hot' tak a nei fo a, tunah pawh DCEU fan-te tana thu lawmawm dang hriat belh tur a awm leh ta! Fan-te beisei phak bakin nakkuma 'Justice League' tihchhuah thar leh tur hi a pui dawn niin a lang a, JL thar nghakhlel taka thlirtute tan chuan ngahhlelhman a awm dawn hle.

Kum 2016-a tihchhuah DC 'Suicide Squad'-a DC villian Joker role hnehsawh taka lo chang tawhtu Jared Leto chu 'Snyder Cut' scene an chan belhah a tel dawn niin Variety leh Hollywood Reporter chuan an tarlang a, kum 2017-a kan lo en tawh JL 'Snyder Cut' hi a pui dawn hle a nih hmel tawh a, fan-te beisei phak bak Zack Snyder hian hmuhtir a tum a nih hmel hle.

The Hollywood Reporter chuan hemi chungchang hi mi hrang hrang hnen aṭanga an hriat thu an tarlang a, nikum lamah khan Variety hnenah Leto hian Joker lema chan leh a la chak thu a lo sawi lang zeuh tawh a, chu a duhthusam chu a thleng dik dawn a nih hmel ta hle.

'Suicide Squad' leh 'Justice League' film tihchhuah tawh kha universe khat an ni tih chu kan hre tlang vekin a rinawm a, Ben Affleck-a Batman kan hmu ve ve bawk nen khawvel khata cheng an ni tih chu a hriat, chutihrual chuan Zack Snyder JL-a Joker a lan erawh hi tumahin an beisei a rinawm loh. Chutih rual chuan Zack Snyder JL khawvelah hian Joker chungchang hi a lang lo tawp a ni lo a, 'Batman v Superman: Dawn of Justice'-ah khan Batman-a sidekick Robin-a suit-a “Ha Ha Ha Joke’s on you Batman” tih Joker-a spray ngei tih hriat tak chu hmuh tur a lo awm tawh a, Variety chuan kha nen khan tuna thuthang awm thar ta hi an sawizawm a, belhchian a dawl dawn em tih hriat a chakawm tawh hle.

Zack Snyder's 'Justice League' hi nakkum hian HBO Max chuan a pe chhuak dawn a, darkar li vel laia thui ni tura beisei a ni. Scene ṭhenkhat shoot ṭhain Ben Affleck, Ray Fisher leh Amber Heard-te an buai mek tawh a, tunah Leto hming a tel ve leh ta a ni.

Hetiang a nih mek lai hian Leto hi DC film dangah chuan a 'killer laugh' nen kan hmu zui tawh dawn lo niin alang thung. Harley Quinn “Birds of Prey”-ah khan a inlan tawh lo a, James Gunn-a'n nakkuma 'The Suicide Squad 2' a tihchhuah turah pawh a inlan a beisei awm loh bawk a, mahse hetah hian Robbie leh Davis chu kan hmu leh dawn thung.

'Justice League' Snyder Cut hi fan-te'n an nawr chhuah a ni ber a, kum 2017-a tihchhuah JL khan fan-te beisei a pha lo a, Snyder-a'n a fanu thihna avanga director nihna a kalsan hnua Jose Whedon-a'n nasa taka an film shoot tawh sa a khawih danglam kha fan-te'n an lawm lo hle a ni.