Mayweather-an ngaihdamna a ring "Pathian chuan min ngaidam thei a ni" n Mayweather

Hneh theih loh Floyd Mayweather hi a chapo an ti a, mi tam takin sual niin an ngai. Mi fel ber chu a ni lo e, mahse ngaihdamna tluantling chu Pathian hnenah chauh a awm tih a hria. A thil lo tihsual tawh tam takte pawh a ngaidam theitu chu Pathian a ni tih Mayweather hian a sawi a, an inhnek kha mi ṭhenkhatin sual leh ṭha inbeihna anga an sawi ṭhin a duh loh thu a sawi bawk.

Judge-te thutlukna mi tam takin an sawiselna karah, Mayweather chuan a chak dan chungchang aiin, ngaihdamna chungchang a sawi lian zawk. Pacquiao nena an inhnek zawh hnua press conference-ah Mayweather chuan, "Pathian chauh hi ka chunga rorel theitu a ni," tiin a thil lo tihsual tawh, dân a lo bawhchhiat a, pawi hrang hrang a lo khawih tawh chungchang sawi chhuakin, "In hriat angin mite chuan an theihnghilhin an ngaidam thei lo a, Pathian erawh chuan min ngaidam thei a ni," a ti.

"Ka tih loh pui ti angin mi tam takin min sawiin, min puh a ni; mahse khang an sawi tam tak kha ka tihsual a ni lo. Ka tihsualah Pathian hnenah ngaihdam ka dil a ni," a ti.

Mayweather chuan, "Mi tam takin kan inhnek kha sual leh ṭha inbeihna angin an sawi a, khatiang zawnga kan inbeihna phochhuah kha ka duh lo," tiin Fox Sports zawhna press conference-ah hian a chhang. Mi tumah famkim kan awm loh thu sawiin, Pacquiao ngei pawh a famkim bik lo tih Mayweather hian a sawi a, chutihrual chuan a fak hle thung.

"Manny Pacquiao hi ka zah a, ka ngaisang a ni. Kan inbeih chhung pawh khan amah zawkin min nawr a, round ṭhenkhatah phei kha chuan ka hneh lo hle a ni," a ti.

Mayweather chanchin hi a ngaih­nawm tehchiam lo. A hun kal tawh hrang hrangah pawikhawihna chi hrang hranga inhnamhnawiha puh leh man a ni. Kum 2012 pawh khan a ngaihzawng ṭhin, Josie Harris kut a thlak avangin thla hnih chhung tân inah khung a lo ni tawh.