Ringtu Ṭha ni mah se Clark Beckham-an lengzem a hnualsuat lo
Pathian hian hmun pakhat ringawta awm tur hian min ko lo niin ka hria. Kohhran leh khawvel inkara palai turah min ko niin ka hria a ni
American Idol intihsiak meka top 3 zinga mi, kar leha Grand Finale-a inlan tur Clark Beckham chuan Kristian ni mah se, lenglawng, secular music a hnualsuat lo tih a sawi a, lenglawng leh lengzem zaithiamte nena inzawmna ṭha tak neih a duh.
American Idol top 3 zinga mi Clark Beckham hi Kristian ṭha tak a ni a, a zir chhuahna pawh Kristian college lar tak, Lee University hnuaia mi a ni. Thlarau Thianghlimin a nun a khawih aṭanga danglamna chhar a, nun thara nung mek a ni.
Beckham hian Mizotena kan ngaih ṭhin ang deuh bawkin ngaihdan a nei ṭhin. Amah ang Kristian ṭha tak zaithiam chuan Gospel lam, Christian Contemporary music ngei mai an sa turah a ngai ṭhin. Mahse hlawhtlinna a chan chhoh a, tun dinhmun a thlen takah chuan ngaihdan thar a nei ta a, chu chu mi tam zawkte tana ngaihthlak chakawm leh nun hruaitu a ni. Chumi tur chuan Kristian hla ringawt lo dueh pawh sak a ngai dawn a, chutiang tur chuan a rilru pawh a insiam niin a sawi.
"Mi tam tak chuan 'Kristian i ni a, worship leader i ni bawk sia, Contemporary music pawh i sa ngei ang a,' min ti ṭhin. Mahse Pathian hian hmun pakhat ringawta awm tur hian min ko lo niin ka hria. Kohhran leh khawvel inkara palai turah min ko niin ka hria a ni," tiin Clark Beckham chuan a sawi.
"Pathian chhanndamna mit aṭanga he khawvel leh kan nun chanchin leh chungchangte hi hlaa phuaha sak ka chak a ni. Music hi ama siam niin ka ngai a, chuvang chuan Pathian hian music ṭha hi a duh niin ka hria. Khawvel ata hi kan inla hrang tur niin ka hre lo a, rimawi hmang emaw pawhin he khawvelah hian ringtute hi kan kal chhuak tur niin ka hria," a ti bawk.