Franklin Graham

US Kristian hruaitute zinga lar, Ṭha leh thiltithei ber Carrie Underwood, Chuck Norris, Brian 'Head' Welch te kan hriat langsar zual an ni.

Mizoramah pawh crusade neia rawn kal a, rawngbawlna ropui tak lo nei tawh, Franklin Graham chu US-a Kristian hruatute zinga lar leh thiltithei bera thlan chhuah a ni.
Newsmax chuan Kristian hruaitu, lar leh thiltithei za a thlang chhuak a, hetah hian politician, zaithiam, actor leh evangelist lar tak tak an lang fur hlawm. A ṭhen chu president atana an awmna party-in a rawt uaih uaih te, a ṭhen chu film siamtu hlawhtlingte an ni.
Franklin Graham chu za zingah hian pakhatnaah a awm a, pahnihnaah Houston, Texas-a pastor lar, Lakewood Kohhran enkawltu, Joel Osteen a awm. Pathumnaah Mark Burnett leh Roma Downey te nupa, The Bible miniseries film siamtu, AD: The Bible Continues leh Son of God movie hlawhtling tak siamtute nupa chu an awm. Palin hi Washington-a an archbishop lar leh huhang ngah, Cardinal Donald Wuerl a ni a, pangana hi khawvel Kristian damlaite zinga mi tam takin ropui bera an ngaih, evangelist lar Billy Graham a ni.
Beisei aiin Rick Warren a sang lutuk lo a, paruknaah a lang a, ani hi California-a kohhran lian leh ṭhangduang tak, Saddleback Kohhran pastor a ni. Tuna Republican Party-in, kum 2016-a US president thlan huna an candidate zinga mi, Mike Huckabee chu pasarihnaah awmin, ani hi Arkansas state-a, Southern Baptist Convention hnuaia pastor a ni. Televangelist hlawhtling, Joyce Meyer chu pakuanaah a awm a, Kristian channel lar tak CBN-a an chairman, Pat Robertson chu 10-na a ni.
Joel Osteen-a nupui, Vic­toria Osteen chu 18-na a ni a, Nicho­las Cage channa, Left Behind film behchhan lehkhabu, Left Behind ziaktu Tim LaHaye chu 19-naah a awm a, Catholic lay-a an hruaitu, Republican Party-in presidential candidate atana an hauh mek zinga mi, US Senator hlui, Rick Santorum chu 31-naah a lang bawk.
Milar langte zingah, NFL player lar leh hlawhtling, Tim Tebow 37-na, Kristian rock band hlawhtling em em, Stryper-a an vocalist, Michael Sweet chu 39-na, actor lar leh hlawhtling Chuck Norris 50-naah, actor tho Kirk Cameron chu 54-naah, 62-naah Carrie Underwood, Hollywood producer Ralph Winter chu 79-na, Korn-a an guitarist ṭhin, Brian Welch chu 84-na, Alaska governor ṭhin, Republican Party-in vice president atana an rawt Sarah Palin chu 87-na leh NBA point gaurd lar Derek Fisher chu 88-naa mite chu kan hriatlar pawl an ni ang.