Bethsy a la hlawhtling

A ṭum hnihna atan Bethsy chuan 'Min Hmangaih Si' hla hmangin Zoram Electrical Store Ṭhazual Faknaah pakhatna a rawn hauh leh ta.

A hma khan Maggie-i chu Bethsy hian rawn nek chhuakin pakhatna a hauh a, tunah pakhatna a hauh leh. Tuna a hla 'Min Hmangaih Si' tih hla hi C. Lalzarmawia phuah a ni a, he hla hi music video-a a siam hnuah Bethsy hian January thla tawp lam khan MDM Library-ah a dah a ni.

February 16 aṭang khan Ṭha­zualah Bethsy hla 'Min Hma­ngaih Si' hi a rawn lang ṭan a, pasa­rihnaah bul a rawn ṭan. Chu­mi hnuah palinaah a rawn kai chho a, pathumnaah chho lehin, pa­hnihnaah a kai chho lehnghal thuai a, pakhatna hi a rawn thleng ta a ni. Pakhatna tih lohah hi chuan a ding lo a, chart tihchhuah apiangin hmalam panin a chho zel a ni. Pakhatna pawh hi tun lo pawh la hauh thei tur khawpa hla ṭha leh music ṭha niin alang.

Amah Bethsy-i chuan he hla hi a hla duh berte zinga mi a ni tih a sawi a, "A pumpuiin he hla hi a ṭha ka ti em em vek a, hringnun kan zinkawng, kawng harsa leh nuam pawh nise, Pathian rinawmzia tarlanna ni a, a hla thu hian min hneh em em a ni. Chang tin mai hian keimah min pawl niin ka hria a, chang tin mai hian ka tan thuchah a hran ṭheuh an keng niin ka hria," a ti.

Betean hma a rawn sawn chak hle a, palina aṭangin pahnihnaah a rawn kai chho. Betea hi Zo rimawiah chuan kan hmelhriatna a rei tawh a, Gospel music huang chhunga palian ṭhin kha a ni a, a la ropui reng a ni. Pahnihna aṭangin Maggie chu pathumnaah a chhuk thla ta thung.

TBC Zaithanpuia hla thar 'Min tlan ta' tih chu palinaah a rawn lang nghal nawlh. Fakna hla huang chhungah chuan ṭum khata thleng sang nghal ber a ni a, a vawi khat rawn lannaah palina a luah nghal. Lengzem huang chhungah DJ Lalvenhimi 'Liam Mai Rawh' leh, Essy hla 'Hey' te kha an vawi khat lannaah palinaah an lang nghal thei bawk.

Zoram Electrical Store Ṭhazual Faknaah hian Lalruatfeli Bawitlung leh Project Fishtail-te sak, 'Kross vangin' tih chu paruknaah a rawn lang thar a, Pensy hla thar 'Ka rawn pan zel' tih chu pariatnaah a rawn lang a, One in Christ hla thar 'Ka zai anga' tih chu pakuanaah kan hmu a, Hmingtea music vidoe thar 'Hnehtu ropui' chu 10-naah a rawn lang thar bawk.

1 Bethsy - Min hmangaih si a

2 Betea - Lungchhir a sawt lo

3 Maggie - Hmangaihna par tlanin

4 TBC-a - Min tlan ta

5 Lalhlumawii - JEBUS-ah

6 Lalruatfeli Bawitlung feat Project Fishtail - Kross vangin

7 Temi Sailoi - Kraws thu

8 Pensy - Ka rawn pan zel che

9 One In Christ - Ka zai anga

10 Hmingtea - Hnehtu ropui