Zonet Thazual Award 2020 : Award sem ceremony zan hnih chhung nei dawn

Mizoram chhunga award sem ceremony sawi hlawh ber zinga mi leh boruak nei lian ber zinga mi ni ṭhin Zonet Ṭhazual Award sem hun a lo hnai leh ta a, a ni tihchian a ni tawh. Kumin hian kumdanga an la tih ngai loh angin zan hnih chhungin award semna hun hi buatsaih a ni dawn a, a 'hot' leh dawn.

November 12 zanah hian Gospel huangchhunga award hrang hrang semna neih a ni ang a, November 13 zanah Lengzem/Lenglawng huangchhunga award hrang hrang semna neih a ni thung ang.

Nomination pawh puan chhuah a ni ṭep tawh a, November 2 hian puan chhuah hman a nih tawh hmel a, award sem boruak a 'hot' chho ṭan leh tawh viau dawn a ni. Gospel huangchhungah category paruk a awm dawn a, Lengzem/Lenglawngah pasarih a awm thung dawn a ni.

Ṭhazual Award semnaah hian performer turte tihchian a la ni lo a, hrileng karah engtiang takin nge ceremony an buatsaih dawn la chiang lo mah se a pui leh hle turah beisei ila kan tisual lo ang. Kumdang ang bawkin sawi hat khawp a nih leh a rinawm a, tunge award hum haw hnem dawn tih pawh hriat a chakawm tawh hle.

Zonet hian kum 2015 aṭang khan MDM artist-te tan Ṭhazual Award hi a buatsaih ṭan a, kumin a kum rukna tur niin award ceremony sem inkhawmah hian mit leh beng a tlai ṭhin hle a ni.