LZa'n thirsakawrin India ram a fangchhuak ta

Boruak thianghlim a awm pawimawhzia tlangaupui paha thirsakawr hmanga India ram fan chhuah tumtu, Vanlallawmzuala Varte (LZa) s/o VL Chhuanawma, Mission Veng chuan a tum tihlawhtlingin, thirsakawr hmangin India ram a fang chhuak ta a, nizan khan an in a thleng leh ta.

LZa hian November 2, 2024 zan dar 10 pelh tawhah khan Selesih thlengin, Selesihah hian a châwl hahdam rih a; nimin tlai khan Durtlangah lut pheiin, amah sponsor-tu Mizoram Pollution Control Board huaihawtin tlaiah MC Hall-ah lawmna inkhawm buatsaih a ni.

Tlai dar 5:30 aṭangin Durtlang Leitan aṭangin welcome parade neihpui a ni a, thirsakawr hmangin mi ṭhahnem takin an zui. Raj Bhavan-ah lutin, Governor Dr Hari Babu Kambhambati-a'n lawmpuina a lo hlan a, inkhawm tawi neih a ni. Chumi hnu zan dar 7:30 velah an veng Mission Veng a thleng phei a, mi ṭhahnem takin an lo hmuak.

YMA, Mission Veng Branch bultumin Mission Veng Bazar kawngpuiah amah lawmna inkhawm buatsaih a ni a, mi eng emaw zatin lawmpuina an hlan a, zaithiamte'n hun an hmang bawk.

LZa hian All India Cycling Tour under Mission LiFE tih hming vuaha India ram fang chhuak tur hian January 25, 2024 khan Aizawl a chhuahsan a, a thupui chu 'Ride to clean air' tih a ni.

India rama state tin (state 28) a tlawh kim vek bakah, union territory panga a tlawh a, Manipur khawpui Imphal tih loh chu state khawpui tin a tlawh.

Km. 17,050 vel a tlan a, a chhuah aṭanga ni 281-naah Mizoram chhung, Vairengte a rawn lut a, ni 285-naah an in a thleng leh ta a ni. State 26 leh UT pali-ah pollution control board-in chawimawina an lo hlan a, zirna-in eng emaw zat tlawhin, chawimawina eng emaw zat a dawng a; state hrang hrangah thing a phun bawk.