2021 Aftershock Festival headline tur MCR leh Metallica

Northern California rock festival Aftershock chu nakkum lamah hi chuan buatsaih leh ngei an tum a, zan li chhung atan buatsaih tura ruahmanna an siamah chuan Metallica leh My Chemical Romance-te chu show headline tur an ni dawn.

Nakkum October 7-10 hian Discovery Park, Sacramento-ah 2021 Aftershock Festival hi buatsaih an tum a, kuminah hripui leng vanga buatsaih theih a nih loh hnuah nakkum lamah erawh festival buatsaihtute chuan rawn kir leh ngei an tum ruh hle. Aftershock Festival hi kum nga liam ta chhung khan ticket an hralh zo vek zel a ni.

Metallica hian zan hnih show an headline dawn a, My Chemical Romance hian zan khat an headline thung ang. Heng rock band pahnihte hi kumina an ṭhulh takah pawh inlan tur an ni a, ticket pawh an hralh zo vek hman nghe nghe.

Nakkumah hian band inlan tur line-up an ṭha dawn hle a, chung zingah chuan  Limp Bizkit, Rancid, The Offspring, Social Distortion, Rise Against, Volbeat, Machine Gun Kelly, Mastodon, Gojira, SEETHER leh Parkway Drive-te pawh an tel.

Festival buatsaihtute chuan an phur tawh hle tih thuchhuah an siamah an tarlang. Nikuma Aftershock festival kha kum khata mi an tel tam ber ṭum niin ni thum chhungin mi 97,500 vel an tel a ni.