Mizo Idol turin inbuatsaih

Zonet chuan a vawi ngana atan Mizo Idol kumin hian a buatsaih leh dawn a, hemi tur hian inbuatsaihna a kal chho leh mek a, tunah hian form lak chhuah theih a ni

Mizo Idol-a tel tur hian Zonet Office, Zarkawt-ah form a lak chhuah theih a, May 30 thlengin thehluh theih a ni a, hemi hnu lama thehluh chu pawm a ni tawh lo ang. Tunah hian form 200 chuang lak chhuah a ni tawh a ni. Mizo Idol hi June thla chawhma lamah tih ṭan theih tura ruahmanna kalpui mek a ni.
Mizo Idol hi kum 2007 aṭang khan buatsaih ṭan a ni a, hemi kum hian form la chhuak ringawt pawh mi 1824 zet an tling a ni. Mizo Idol neih hmasak berah hian Lallawmpuia Fanai, Champhai chu Idol-a thlan a ni.
Kum 2009 khan a vawi hnihna neih leh a ni a, hetah hian form la chhuak mi 821 awmin, H. lalchhanchhuaha (Chhantea) chu pakhatna a ni. Kum 2011 khan neih leh a ni a, mi 632 ten form la chhuakin, Lalthuṭhaa chu Idol-a thlan a ni a, kum 2013 khan Grace Lalchhanhimi chu Idol-a thlan a ni.
Mizo Idol intihsiak hmasa ber aṭanga kum 2009 thleng khan Rammawia, Rinliana leh Rebecca Saimawii te chu judge an ni a, Rebecca Saimawii hi Idol hnuhnung ber thlang khan judge panel-ah hian a ṭhu. Kum 2011 aṭang khan Rinzauva Sailo leh Robin Lalremruata te judge-ah hian an
ṭhu ṭan thung. Anniho bakah hian Elimination Round-ah mi hrang hrang guest judge turin an sawm a, an ṭhu tawh a, chung zingah chuan Mami Varte leh Henry Lalmawizuala te pawh an tel.
Buatsaih ṭan tirh aṭanga a hnuhnung ber thleng khan, intihsiaknaah thil danglam a awm zeuh zeuh a, a thlan dan leh kalpui dan pawh siam danglam hret hret a ni ṭhin. Kumin hian thil danglam a awm ang em a la hriat loh a, a buatsaihtute lamin engmah an la sawi chhuak rih lo.