American Idol an titawp tawh dawn

Khawvela singing competition hlawhtling leh hriat hlawh, zaithiam lar tak tak lo chhar a, mi hriat ngai lohte khawvel hriata lo chher chhuak tawhtu American Idol chu a tawp dawn hnai ta.

American Idol season 15-na hi nakkum khian neih leh a ni ang a, hemi bak hi chu American Idol a awm tawh lo ang. Hetah hian Ryan Seacrest chuan a host leh ang a, Keith Urban, Jennifer Lopez leh Harry Connick Jr. te judge-ah an awm leh ang.

Ryan Seacrest hian Twiiter-ah American Idol neih leh tur hi a hnuhnung ber a ni tawh dawn tih a sawi a, American Idol an neih hmasak ber khan Ryan Seacrest hi kum 27 mi chauh a ni a, tunah chuan kum 40 a lo tling ve tawh a ni. American Idol hi kum 2002 aṭanga buatsaih ṭan kha a ni a, Simon Cowell, Paula Abdul leh Randy Jackson te judge-ah an awm a ni. Hemi hnu hian judge-ah mi hrang hrang an awm chho a, Kara DioGaurdi te, Ellen DeGeneres, Steven Tyler, Mariah Carey leh Nicki Minaj te pawh an tel a ni.

American Idol aṭanga rawn hlawhtling tam tak zingah Kelly Clarkson, Carrie Underwood leh Jennifer Hudson te chu A List star kan tihte zinga mi an ni.