10th Ṭhazual Award: Zaninah Gospel zan hmang dawn ta

Mizorama Music Award sawi hlawh leh boruak nei lian ber zinga mi, Zonet Ṭhazual Award vawi 10-na chu zanin aṭang hian neih a ni dawn ta. Host Zonuni Pachuau kaihhruaina hnuaiah show ropui tak kan hmu leh thei dawn a, mit leh beng a tlai leh hle dawn e.

Ṭhazual Award 2024 hi kum dang ang bawkin zan hnih neih a ni leh dawn a, zaninah Gospel zan hmangin, naktuk November 8, 2024 zanah Lengzem zan hman a ni ang.

Gospel huangchhung bikah hian category pasarihah award sem a ni dawn a, category hrang hranga nominee te pawh an theuneu lo hle. Zanina perform turte hi gospel artist kan neih ṭhat ber ber, zaia rawngbawlna kawngah pawh thawh hlawk tak takte an ni. Award show neih rualin fakna inkhawm ropui tak kan hmang leh thei dawn a ni.

Jonathan Lianhna chu nomination hmu hnem ber niin best male artist, best group/duo, best music video, best songwriter leh song of the year-ah nominee a ni. Best male artist-ah hian Nghaktea Fanai, TBC Zaithanpuia, Thawhlehnaniropuia leh Zorema Khiangte te nen an in el ang. Hmeichhe lamah Cindy Lalthanpuii chuan nomination pathum hmuin a hmu hnem ber a, best female artist, best group/duo leh best music video-ah a lang. Best female artist nominee dangte chu Lalduhsaki, Lawmi Khiangte, Melody Lalzirliani leh Zoramchhani te an ni. A tu pawhin dawng se dawng awm tak vek an ni e.

Best songwriter award dawng thei turin Jonathan Lianhna, Benjamin Pazawna, Chris MS Dawngkima, Israela Pachuau leh KLR Tetea te chhawp chhuah an ni. Song of the year nomination-ah Lawmi Khiangte 'A chhawk duh che', Jonathan Lianhna 'Ka pawn lam lan dan', Israela Pachuau & Vanlallawmi 'Kristian Chhungkua', Synod Choir 'Lungawina kim' leh Zorema Khiangte 'Mal min sawm' te an lang bawk.